އައްޑޫ ސިޓީގެ ރައްޔިތުން ކަރަންޓު ކެޑޭ މައްސަލައިގައި ބޯހާސްވެފައި ތިއްބާ ލައިގަތީ އެއަށް ވުރެ މާބޮޑު ކަންތަކަކެވެ. އެހެން ތިއްބާ ކުއްލިއަކަށް ކަރަންޓް ބިލް އިންތިހާ އަށް ބޮޑުވެގެން ދިޔައީ އެވެ.
ގިނަ ރައްޔިތުން ތަކެއްގެ ފާޑު ކިޔުން އަބަދުވެސް އަމާޒުވެފައިވާ އައްޑޫ ސިޓީ ކައުންސިލުން ވަނީ މިމައްސަލައިގައި ރައްޔިތުންގެ ދިފާއުގައި ނިކުމެފައެވެ. އަދި އިއްޔެ ކައުންސިލްގެ ފަރާތުން ވަނީ އައްޑޫ ސިޓީގެ ހުރިހާ އިންޖީނުގެ ތަކެއް ކައުންސިލަށް ނެގުމަށް ވެސް ނިންމާފައެވެ. ނަމަވެސް ރައްޔިތުންގެ މަޖިލީހުގައި އައްޑޫ ސިޓީ ތަމްސީލު ކުރައްވާ އެއްވެސް އިއްޒަތްތެރި މެންބަރެއްގެ އަޑެއް މިކަމުގައި ނީވެއެވެ.
އިއްޒަތްތެރި މެންބަރަކު ކުރައްވާ ޓްވީޓަކީ ނުވަތަ އޭނާގެ ފޭސްބުކްގައި ލިޔެލާ ލިޔުމަކީ އެބޭފުޅުން ކަރަންޓުގެ މައްސަލައިގައި ކަންބޮޑުވުމެއް ފާޅުކުރުން ކަމުގައި ބަލައެއް ނުގަނެވޭނެއެވެ. ސަބަބަކީ އެބޭފުޅުންނަށް އިއްޒަތްތެރި ކަމުގެ ލަޤަބު ރައްޔިތުން ދިނީ އެމީހުންގެ އަޑު ފޭސްބުކާއި ޓްވިޓާގައި އިއްވުމަށް ކަމަށް ނުވާތީއެވެ.
އައްޑޫ ސިޓީގެ ގިނަ ރައްޔިތުން އުއްމީދުކޮށްގެން ތިބީ ރައްޔިތުންގެ މަޖިލީހުގައި ތިއްބެވި އައްޑޫގެ މެންބަރުންގެ ފަރާތުން ކަރަންޓުގެ މައްސަލަ ހައްލުކުރުމަށް މަޖިލީހުގައި ވަކާލާތުކޮށްދެއްވާނެ ކަމަށެވެ. ނަމަވެސް އައްޑޫ ސިޓީގެ ރައްޔިތުންގެ އަޑު މަޖިލީހުގައި އިއްވާލަން ކެރޭ އެއްވެސް މެންބަރަކު ނެތް ކަމީ އައްޑޫގެ ރައްޔިތުން ހިތާމަ ކުރަން ޖެހޭ ކަމެކެވެ.
ކުރީގެ ރައީސް ނަޝީދުގެ މައްޗަށް ބޭއިންސާފުން ޙުކުމެއް ކުރި ކަމަށް ބުނެ ރައްޔިތުންގެ މަޖިލީހުގައި އެމްޑީޕީ އިން ކުރަމުން ދިޔަ އިޙްތިޖާޖްގައި ދުންމާރި ފުމެ އުޅުނު ހިތަދޫ ދެކުނު ދާއިރާގެ މެންބަރު އަލީ ނަޒާރު އަށް ކަރަންޓުގެ މައްސަލައިގައި އައްޑޫ ސިޓީގެ ރައްޔިތުންގެ ފަރާތުން ދުންމާރި ފުމައެއް ނުލެވުނެވެ. ނުވިތާކަށް ކަރަންޓުގެ މައްސަލައިގައި މައުލޫމާތު ހޯދާލުމަށް ގުޅުމުން 'ބިޒީ' ކަމުން ފޯނެއް ވެސް ނުނެންގެވުނީ އެވެ.
މީދޫ ދާއިރާގެ މެންބަރު ރޮޒެއިނާ އާދަމްގެ ކަންތައް ވެސް ހުރީ މިކަހަލަ ގޮތަކަށެވެ. ރީކޯ މޫސަގެ ކަންކަށި މަތީގައި ވެސް ޖަހަން ޖެހިއްޖެ ނަމަ ފަސް ނުޖެހޭނެ ކަމަށް ބުނި ނަމަވެސް އައްޑޫ ރައްޔިތުންގެ ޙައްޤުގައި ފެނަކަ ކޯޕަރޭޝަނުގެ ކަންކަށި މަތީގައި ޖަހާކަށް ރޮޒޭނާ އަކަށް ވެސް ކެރިވަޑައެއްނުގަތެވެ.
ހިތަދޫ މެދު ދާއިރާގެ މެންބަރު އިބްރާހިމް ދީދީ މިވަގުތު ހުންނެވީ ބޭސް ފަރުވާ އަށް ރާއްޖެއިން ބޭރުގައެވެ. އެހެންކަމުން އެބޭފުޅާގެ ކަރަންޓުގެ މައްސަލައިގައި އެއްޗެކޭ ވިދާޅު ނުވިޔަސް ދާއިރާގެ ރައްޔިތުން ފަހަރުގައި އެކަން މައްސަލަ އަކަށް ނުހަދާ ހިނގައި ދާނެއެވެ.
ދެން ހުންނެވީ ހިތަދޫ އުތުރު ދާއިރާގެ މެންބަރު އަސްލަމް އެވެ. ރައްޔިތުންގެ މަޖިލީހުގެ އިންތިޚާބަށް ފަހު އަބަދުވެސް ހަނު ހުންނެވުމުގެ ޙައްޤު ބޭނުންފުޅު ކުރައްވާ އަސްލަމްގެ ފަރާތުން ވެސް ކަރަންޓުގެ މައްސަލައިގައި ކަންބޮޑުވުމެއް ނުފެނެއެވެ.
މަރަދޫ ދާއިރާގެ މެންބަރު ޝަރީފުގެ ޚަބަރެއް ނުވެގެން މަރަދޫ ދާއިރާގެ ބައެއް މެންބަރުން އުޅޭ ކަމަށް ވެއެވެ. ސަރުކާރު ހިންގާ ޕާޓީ އަށް ނިސްބަތްވާ ފޭދޫ ދާއިރާގެ މެންބަރ އިބްރާހިމް ދީދީ (އައިބީ) އާއި ހުޅުދޫ ދާއިރާގެ މެންބަރު ޝާޑު އަށް ކަރަންޓުގެ މައްސަލައެއް އެބޭފުޅުންނަށް ދިމާވެގެން އުޅޭހެން ހަމަ "ހީވެސް ނުވަނީ" އެވެ.
ރައްޔިތުން ހަނާވެގެން ހޮވި މެންބަރުންގެ ފަރާތުން މިފެންނަނީ އެބޭފުޅުންގެ އަމިއްލަ އެދުން ކުރިއަށް ނެރެގެން އުޅުއްވާ ތަނެވެ. "އަނިޔާވެރިކަމާޢި ދެކޮޅަށް ދިވެހިންގެ" ނަމުގައ ބާއްވާ މުޒާހަރާތަކުގައި ބައިވެރިވެ ރޮޒެއިނާ އާއި އަލީ ނިޒާރު ރައީސް ނަޝީދު ދޫކޮށްލުމަށް ހަމައެކަނި ގޮވާލުމަށް ވުރެ އައްޑޫގެ ރައްޔިތުންނަށް ފެނަކައިން ދެމުންގެންދާ އަނިޔާތަކުގެ ވާހަކަ ދެއްކުން މާ ބޭނުންތެރި ކަމަށް ފެނެއެވެ.
މިއަދު މާލޭގައި އަގުހެޔޮ ކަރަންޓު ލިބިގެން ތިބޭފުޅުން ހެވިފައި ތިއްބަސް ތިބޭފުޅުންގެ ދާއިރާގެ ރައްޔިތުން ތިބީ މާޔޫސް ކަމާއި އެކު ކަރަންޓުގެ މައްސަލަ އަށް ހައްލެއް ލިބޭނެ ދުވަހެއްގެ އިންތިޒާރުގައެވެ.