އިންޑިއާގައި ޓެސްލާގެ ފެކްޓްރީއެއް ހެދުމުގެ ވާހަކަ ވެސް ދެކެވިފައި ވަނިކޮށް އެ ކުންފުނީގެ ވެރިޔާ އީލޮން މަސްކް އަންނަ ހަފުތާގައި އިންޑިއާ އަށް ކުރައްވަން އޮތް ދަތުރު އަހަރުގެ ފަހުކޮޅަށް ފަސްކޮށްކޮށްފި އެވެ.
ދެ ދުވަހަށް ކުރައްވާ ދަތުރުގައި އީލޮން އިންޑިއާ އަށް ވަޑައިގަންނަވާ ގޮތަށް ކުރިން އޮތީ މާދަމަ އެވެ.
ނަމަވެސް ދަތުރު ލަސްކުރެއްވިކަން މިއަދު އެކްސްގައި ހިއްސާކުރައްވައި އޭނަ ވިދާޅުވީ ދަތުރު ލަސްކުރަން ޖެހިވަޑައިގަތީ ޓެސްލާގެ ބޮޑެތި މަސައްކަތްތަކަކާ ހެދި ކަަމަށެވެ. އެކަމަކު އަހަރުގެ ފަހުކޮޅު އިންޑިއާ އަށް ޒިޔާރަތްކުރައްވާނެ ކަމަށް ވިދާޅުވި އެވެ.
Unfortunately, very heavy Tesla obligations require that the visit to India be delayed, but I do very much look forward to visiting later this year.
— Elon Musk (@elonmusk) April 20, 2024
އިންޑިއާ އަށް އީލޮން ކުރައްވާ ދަތުރުގެ ތެރޭގައި ބޮޑުވަޒީރު ނަރެންދުރަ މޯދީ އާއި އިންޑިއާގެ ޓެކް ކުންފުނިތަކާއި އަލަށް އުފަންވި ޓެކް ސްޓާޓަޕްތަކާ ވެސް ބައްދަލުކުރައްވާނެ ކަމަށް މީޑިއާތަކުން ބުނެފައިވެ އެވެ.
އިލެކްޓްރިކް ވެހިކަލް (އީވީ) އުފެއްދުމުގައި އެންމެ ކުރީގައި އުޅޭ ޓެސްލާ އިން އެ ކުންފުނީގެ ފެކްޓްރީއެއް އިންޑިއާގައި ހެދުމުގެ ވާހަކަ ދެކެވެން ފެށީ 2020 ގަ އެވެ. ރިޕޯޓްތައް ބުނާ ގޮތުން ޓެސްލާ އިން އިންޑިއާގައި 2-3 ބިލިއަން ޑޮލަރު އިންވެސްޓްކުރަން ޕްލޭންކޮށްފައިވެ އެވެ.
ޓެސްލާގެ އިތުރުން ކުރީގެ ޓްވިޓާ އަދި މިހާރުގެ އެކްސްގެ އިތުރުން ސްޕޭސް އެކްސް ފަދަ ބޮޑެތި ކުންފުނިތަކުގެ ވެރިޔާ އީލޮން އަކީ މި ވަގުތު ދުނިޔޭގައި ހަތަރު ވަނަ އަށް އެންމެ މުއްސަނދި މީހާ އެވެ. އޭނަގެ މިލްކިއްޔާތު 194.6 ބިލިއަން ޑޮލަރަށް އަރަ އެވެ.