ރައްޔިތުންގެ މަޖިލީހުގެ އިންތިހާބުގައި 09:00 އާ ހަމައަށް ވޯޓުލާފައިވަނީ 8.6 އިންސައްތަ މީހުން ކަމަށް އިލެކްޝަންސް ކޮމިޝަނުން ބުނެފިއެވެ.
މިއަދު ކުރިއަށްދާ ރައްޔިތުންގެ މަޖިލީހުގެ އިންތިހާބުގައި ޖުމުލަ 284،663 މީހަކަށް ވޯޓްލުމުގެ ހައްގު ލިބިގެންވެއެވެ.
އިލެކްޝަންސް ކޮމިޝަނުން ބުނެފައިވަނީ 09:00 އާ ހަމައަށް ވޯޓުލާފައިވަނީ އޭގެތެރެއިން 24،703 މީހުން ކަމަށެވެ. އެއީ ވޯޓުލެވޭ އާބާދީގެ 8.68 އިންސައްތައެވެ.
މިހާރު ކުރިއަށްދާ ރައްޔިތުންގެ މަޖިލީހުގެ އިންތިޚާބު 2024ގައި 9:00އާ ހަމައަށް ވޯޓުލާފައިވާ ނިސްބަތް #vihi24 pic.twitter.com/Hn6XaLolc4
— Elections Commission (@ElectionsMv) April 21, 2024
ރައްޔިތުންގެ މަޖިލީހުގެ އިންތިޚާބު 2024 ގައި ގާއިމުކޮށްފައިވާ ހުރިހާ ވޯޓުލާ މަރުކަޒެއްގެ ވޯޓުނެގުން ވަނީ ފެށިފައެވެ. ވޯޓުލުން ކުރިއަށްދާނީ ހެނދުނު 08:00 އިން ހަވީލު 05:30 އަށެވެ.
ރައްޔިތުންގެ މަޖިލީހުގެ އިންތިޚާބު 2024 ގައި ޖުމުލަ 602 ވޯޓު ފޮށި ބަހައްޓާފައިވެއެވެ.
ރައްޔިތުންގެ މަޖިލީހުގެ މި އިންތިހާބުގައި 93 ދާއިރާއަކަށް މެންބަރުން އިންތިޚާބު ކުރާނެއެވެ. ޖުމުލަ 368 ކެންޑިޑޭޓުން މި އިންތިހާބުގައި ވާދަކުރެއެވެ.