މާލެ އާއި އަޅާ ބަލާއިރު، އައްޑު އަތޮޅާއި ތިލަދުންމަތީގެ ރަށްތަކުގައި، އަސާސީ ޚިދުމަތެއް ކަމުގައިވާ ކަރަންޓުގެ ޚިދުމަތް ދިނުމުގައި ސަރުކާރުން ތަފާތުތައް ގެންގުޅޭތީ، އެމައްސަލަ ދިވެހިރާއްޖޭ އިންސާނީ ޙައްގުތަކާއި ގުޅޭ މުއައްސަސާ (އެޗްއާރުސީއެމް) އަށް އަމިއްލަ ފަރާތަކުން މިއަދު ހުށަހަޅައިފިއެވެ.
ފެނަކަ ކޯޕަރޭޝަނަށް ރައްދުކޮށް އެފަރާތުން ހުށަހެޅި އެޗްއާރުސީއެމްގެ މައްސަލަ-ފޯމް އަދި ބިލްތަކުގެ ކޮޕީތައް "އައްޑޫ ލައިވް" އަށް ވަނީ ލިބިފައެވެ.
މައްސަލަ ފޯމްގައި އެފަރާތުން ފާހަގަކޮށްފައިވާގޮތުން އެއްވެސް އެންގުމަކާއި ނުލާ ފެނަކަ ކޯޕަރޭޝަނުން ވަނީ ރަށްރަށުގެ ކަރަންޓުބިލްތައް އިންތިހާއަށް ބޮޑުކޮށްފައެވެ. އަދި އައްޑު އަތޮޅުގެ ވިޔަފާރިތަކުގެ ކަރަންޓު ބިލްގައި މިހާތަނަށް އައިއިރު އެއްވެސް ސަބްސިޑީގެ ޢަދަދެއް ހިމަނާފައިނުވާ ކަމަށެވެ.
އެހެންކަމުން ފެނަކައިން ސަބްސިޑީ ކަނޑާލުމުން ބިލްބޮޑު ބޮޑު ވީކަމަށް ބުނި ނަމަވެސް އެއީ ޙަޤީގަތެއް ނޫންކަމާއި، ބިލް ބޮޑުވީ ޔުނިޓް-ރޭޓް ބޮޑުކުރުން ކަމަށް ފާހަގަ ކޮށްފައިވެއެވެ. އަދި ބޭންޑްވިޑްތް ކަނޑައެޅުމުގައި ވެސް އައްޑުއަތޮޅުގެ ރަށްތަކުގައި ރޭޓްތައް ހުރީ އާދަޔާއި ޚިލާފު މިންވަރަކަށް ބޮޑުކޮށް ކަމަށް ބުނެ ވަނީ ޝަކުވާހުޅާފައެވެ.
މާރޗް މަހުގެ ބިލް ލިބުނުއިރު، ފާއިތުވެދިޔަ މަސްތަކުގެ ބިލްތަކާއި އަޅާ ބަލާއިރު، ބިލުގެ ޢަދަދު މާ ބޮޑުވުމުގެ ސަބަބުން ރަށްރަށުގެ ވިޔަފާރިތައް ވަނީ ކުއްލި ހައިރާންކަމަކާއި ހާސްކަމެއްގެ ތެރެއަށް ވެއްޓިފައެވެ. އަދި މީގެ ސަބަބުން ތަކެތީގެ އަގު ބޮޑުކުރަން މަޖުބޫރު ވާނެކަމަށާއި، ނަމަވެސް އެއީ އެދޭގޮތް ނޫންކަމަށް ބުނެ އެމީހުން ދަނީ އެކި ސިފަސިފައިގައި ނުރުހުން ފާޅު ކުރަމުންނެވެ.
އަދި މިޙަރަކާތްތަކުގައި، އައްޑު އަތޮޅުގެ ކައުންސިލުން ވެސް ދަނީ ބޮޑު އެއްބާރުލުމެއް ދެއްވާ، ހަމަ އެފަދަ ކަންބޮޑުވުންތައް ޙިއްސާކުރަމުންނެވެ.