އައްޑޫސިޓީގެ ރައްޔިތުން އުއްމީދަކީ މި ސިޓީ %100 ކަބަން ނިއުޓްރަލް ސިޓީ އަކަށް ވުމެވެ. އަދި މި އުއްމީދު ހަގީގަތަކަށް ވެދާނެކަމަށް އެންމެ ބޮޑަށް ޤަބޫލު ކުރެވެން ފެށީ ސިޓީގެ މޭޔަރު ޢަބްދުﷲ ސޯދިޤް (ސޯބެ) ގެ ފަރާތުންނެވެ.
މިހާރަކަށް އައިސް ގިނަ ފޯރަމް ތަކުގައި މޭޔަރ ވަނީ މިކަމާއި ގުޅޭގޮތުން ވާހަފުޅުދައްކަވާފައެވެ. އައްޑޫސިޓީ އަކީ ރާއްޖޭގެ އެންމެ ފުރަތަމަ ކާބަން ނިއުޓްރަލް ސިޓީކަމަށް ހައްދަވާނެ ކަމަށް ވިދާޅުވެފަ އެވެ. އަދި މިކަން 2020 ވަނަ އަހަރާއި ހަމައަށް ނިންމާލެވޭނެ ކަމަށް މޭޔަރު ޤަބޫލު ކުރައްވަ އެވެ.
ކައުންސިލަރުން ބުރަކޮށް އުޅުއްވަމުން، ބަޖެޓުގެ ގޮތުން އެހާ ތާށި ދުވަސްވަރެއްގައި ވެސް ވަނީ ތަފާތު ގައުމު ތަކަށް ވަޑައިގެންފައެވެ. ގަައުމުތަކުގައި އިއާދަ ކުރެނެވި ހަކަތައިން ކަރަންޓު އުފައްދާ ގޮތާއި ބެހޭ ގޮތުން މަޢުލޫމާތު ހޯދުމަށެވެ. މިއީ މިކަމަށް ކައުންސިލުން ދޭ ސަމާލުކަމެވެ.
މޭޔަރުގެ މި ހުވަފެން މިހާރު މުޅި އައްޑޫ ސިޓީގެ ރައްޔިތުންވެސް ބަލައިފިއެވެ. އެބައިމީހުންނަށް މި ހުވަފެން ވެގެން ދިޔައީ ވަރަށް ކަމުދާ ހުވަފެނަކަށެވެ.
އެހާހިސާބުން އެންމެންގެ ސުވާލަކަށްވީ، މިކަން ކުރެވޭނެ ބާ؟ މި ސުވާލެވެ. އަހަރެންގެ ޖަވާބަކީ " މިކަން ނުކުރެވެން ވީ ކީއްވެ ބާ ؟ " މިއެވެ.
ކައުންސިލުން ދޯޙާ އަށާއި ބެންކޮކަށް އަދި އެ ފަދަ އެހެން ގައުމުތަކަށް ކުރެއްވި ދަތުރުފުޅުތަކުގައި ދުނިޔޭގައި މިފަދަ ދާއިރާތަކަށް އިންވެސްޓް ކުރާނެ ބަޔަކު އެބަ ތިބި ކަން ޔަގީންވެއްޖެ އެވެ. އެވާހަކަ އެމީހުން ދައްކަން ވެސް ދައްކަ އެވެ.
ދެން އޮތީ އެހެން ސުވާލެކެވެ. އެއީ މިހާތަނަށް ކައުންސިލަށް މިފަދަ އެއްވެސް އިންވެސްޓަރެއް ހޯދިފައިވޭތޯ އެވެ؟
ކައުންސިލަރުންނާއި އާއްމުކޮށް އަޅުގަޑާއި ބައްދަލުވެއެވެ. އެބެފުޅުންނާއި ތަފާތު ވާހަކަތައް ދެކެވެއެވެ. އަޅުގަޑާއި މިހާތަނަށް ދެކެވުނު ވާހަކަ ތަކުން އެނގުނީ އެ ބޭފުޅުން މިހާތަނަށް ކުރެއްވި ދަތުރުފުޅު ތަކުގެ މަގުސަދަކަށް ވީ އިންވެސްޓަރުން ދުނިޔޭގައި އުޅޭކަން ޔަގީން ކޮށްލުން ކަމަށެވެ. ކޮންމެއަކަސް މިއީ ވެސް ވަރަށް ބޮޑު ކުރިއެރުމެކެވެ.
މިފަދަ ބޮޑު ޕްރެޖެކްޓެއް ހިންގަން ވާނީ ރަނގަޅަށް މަޢުލޫމާތު ލިބިގެން ކަމަށް ވާތީ އަޅުގަނޑު ބެލީ ކައުންސިލަރުން އެކުރެއްވި ދަތުރުފުޅުތަކަކީ މި މަސައްކަތުގެ ފުރަތަމަ ފިޔަވަހި ކަމަށެވެ.
އަޅުގަނޑު އުންމީދު މިކުރަނީ ކައިރި މުސްތަގްބަލެއްގައި ދެވަނަ ފިޔަވަހީގެ މަސަކަތް ފެނިގެންދާނެކަމަށެވެ. ނަމަވެސް އެއީ ކޮން ކަމެއް ކަން ހަމަ އެކަކަށް ވެސް ނޭނގެ އެވެ.
ފަހަރުގައި ދެވަނަ ފިޔަވައްސަކަށް ވާނީ ދުނިޔޭގައި ހަމަ "ހަގީގަތުގައި ވެސް" އިޔާދަ ކުރެނެވި ހަކަތައިން ކަރަންޓް އުފައްދާކަން ޔަގީން ކޮށްލުން ނޫންބާވައެވެ؟. އަހަރެމެންގެ ވިސްނުން އަބަދުވެސް "ޕޮޒިޓިވް" ވާން ވާނެ އެވެ. އެ ނޫން ގޮތަކަށް މިކަން ކުރެވެން ނެތެވެ.
ދާދި ފަހުން ކައުންސިލަރުން ވަނީ ބެންކޮކަށް ގޮސް ކުނިން ހަކަތަ އުފައްދާތަން ބަލާފައެވެ. އެ ދަތުރަށް ފަހު މި ނިޒާމަކީ އައްޑޫއަށް އެންމެ ކަމުދާ ނިޒާމް ކަމަށް ވިދާޅުވެ ވާހަކަ ދެއްކެވި އެވެ.
މިކަމާއި ގުޅޭ ފުރިހަމަ މައުލޫމާތު އަޅުގަނޑަށް ދިނީ ކައުންސިލްގެ އެންވައިރުމެންޓް ސެކްޝަނާއި ހަވާލުވެ ހުންނެވި ކައުންސިލަރ ހުސެއިން ފަހުމީއެވެ.
ފަހުމީ ވިދާޅުވީ ދުވާލަކު 40 ޓަނު ކުނިން 1 މެގަވަޓް ކަރަންޓު އުފެއްދޭ ކަމަށެވެ. އެހެންވެ ކައިރީގައި އޮތް ޝަންގްރިއްލާ ރިސޯޓާއި އައްޑޫގެ އެހެން ރަށްރަށުން އުފެދޭ ކުނިން މި ނިޒާމް ގާއިމް ކުރެވިދާނެ ކަމަށެވެ. ފަހުމީ ވިދާޅުވީ ހަމައެކަނި ޝަންގްރިއްލާއިން ވެސް ދުވާލަކަށް 20 ޓަނު ކުނި އުފެދޭ ކަމަށެވެ. އެހެންވެ އައްޑޫ ސިޓީ އިން ދުވާލަކަށް 40 ޓަނު ކުނި ހޯދުމަކީ އުނދަގޫކަމެއް ނޫން ކަމަށެވެ. އަދި ގަސް އިންދައިގެން އެއިން ފައިބާ ފަތްތަކުން ވެސް ކަރަންޓް އުފެއްދޭނެ ކަމަށް ވިދާޅުވި އެވެ.
މިވާހަކަ ވީ އަޅުގަޑަށް ލިބުނު ބޮޑު އުފަލަކަށެވެ. ވީ އުފަލެއްގެ ބޮޑުކަމުން މި ވާހަކަ ހުރިހާ ރައްޓެހިންނާއި ދަންނަމީހުނާއި ހިއްސާކުރީމެވެ. އެންމެންވެސް ވަރަށް "ހެޕީ"ވިއެވެ. އައްޑޫ ސިޓީގެ "ޑްރީމް" ހަގީގަތަކަށް ވާތީވެ އެވެ.
މިއުފަލެއްގައި ހުއްޓާ ކަންދިމާ ކުރި ގޮތުން ޔޫއެންގެ މީހަކާއި ބައްދަލުވި އެވެ. އޭނާއާއި ބައްދަލުވެ ދެކެވުނު ވާހަކައެއްގައި ކައުންސިލަރުންގެ މޮޅު ވާހަކަ އާއި އެމީހުންގެ ހީވާގިކަމަށް ތައުރީފް ކޮށް 2020ގެ ކުރިން އައްޑޫ ކާބަން ނިއުޓްރަލް ވާނެކަމަށް ބުނީމެވެ. އެގޮތުން ދާދި އަވަހަށް އައްޑޫގައި ކުނިިން ހަކަތަ އުފައްދާނެކަމަށް ބުނީމެވެ.
މިކަމުގައި ކައުންސިލަރުން ހޯދި ކާމިޔާބީ އާއި އެމީހުން ތައިލެންޑަށް ގޮސް މިތަންތަން އަމިއްލަ އަށް ބަލައި ތަޖްރިބާ ކުރި ވާހަކަވެސް ބުނީމެވެ،
ނަމަވެސް އޭނާގެ ފަރާތުން ލިބުނީ މުޅިން އުއްމީދު ކުރި ކަހަލަ ޖަވާބެއް ނޫނެވެ. އަހަރެން މާޔޫސްވި އެވެ. އޭނާ ބުނީ ތީ ނުވާނެ ކަމެއް ކަމަށެވެ.
އޭނާ ބުނީ ކުނިން ހަކަތަ އުފެއްދުމަށް ތައިލެންޑްގައި ބޭނުންކުރާ ނިޒާމަކީ ދުނިޔޭގެ ވެސް އެންމެ އުނދަގޫ ބޮޑު ނުވަތަ އިނގިރޭސިން ދަންނަވާ ނަމަ " ކޮމްޕްލެކްސް" ނިޒާމު ކަމަށެވެ. އަދި އެ ސިސްޓަމް މި ސިޓީގައި ފީސިބަލް ނުވާނެ ކަމަށް ބުންޏެވެ.
އެހެންވެ މިކަމާއި ވަރަށް މާޔޫސްވެ މި މީހާ ބުނި އެއްޗަކާއި މެދު ކުޑަ ދިރާސާއެއް ހެދުމަށް ޝައުޤުވެރިވިއެވެ. އެގޮތުން ބެލިބެލުމުން އެނގުނީ އެވްރެޖްކޮށް އައްޑޫގައި މީހަކު ދުވާލެއްގެ މައްޗަށް 0.8 ކިލޯ ކުނި އުފައްދާކަމަށެވެ. އެގޮތަށް ބަލައިގެން މި ސިޓީގެ އާބާދީ 20،000 ކަމަށް ބެލި ނަމަވެސް ދުވާލަކު އުފެދެނީ 16 ޓަނު ކުންޏެވެ. 40 ޓަނުން 1 މެގަވަޓް ކަރަންޓް އުފައްދަން ބަލާއިރު އެހާވަރަށް ކުނި މި ސިޓީގައި ނުއުފެދެ އެވެ. އެހެންކަމުން މިކަން ކުރަން އޮތް ހަމަ އެކަނި ގޮތަކީ މި ސިޓީ އަށް ބޭރުން ކުނި އެތެރެ ކޮށްގެން މިކަން ކުރުމެވެ.
ދެންބެލީ އެހެން ގޮތެއް އޮތްތޯއެވެ. ކުނިން ހަކަތަ އުފެއްދުމަކީ ނުވާނެ ކަމެއް ކަމަށް ބުނި ޔޫއެންގެ މީހާ އާއި އެއްބައިވެ ދެން މިކަން ވާނީ ކިހިނެއްތޯ ބެލި އިރު މިކަމަށް ހައްލެއް ވަށައިގެންވާ ބިޔަ ކަނޑުން ލިބިދާނެ ކަމަށް ގަބޫލްވިއެވެ. އެހެންވެ ދުނިޔޭގެ އެހެން ގައުމުތަކުގައި މިކަން ކުރާގޮތް ބެލީމެވެ.
ކަނޑުގެ އޮއިވަރުން ކަރަންޓް އުފެއްދުމުގެ ވާހަކަ އަކީ އެންމެނަށް ވެސް އަޑުއަހާ ވާހަކަ އެކެވެ. ނަމަވެސް އެންމެނަށް އެނގޭ ވާހަކަ އެއް ނޫނެވެ.
އެންމެންނަށް ވެސް އެނގެނީ ސޯލާ ޕެނަލް އާއި ވިންޑް މިލްގެ ވާހަކެ އެވެ. ދެން އިހަކަށް ދުވަހު އެނގިގެން ދިޔައީ ކުނިން ކަރަންޓު އުފައްދާ ވާހަކަ އެވެ. އަދިވެސް އޮއި ބޭނުން ކޮށްގެން ކަރަންޓް އުފައްދާ ވާހަކަ އެއް ނޭނގެ އެވެ. އެކަން ގިނަ ބަޔަކަށް ވެފައި އޮންނަނީ އެނގުމަށް ވުރެ ބޮޑަށް އިވޭ ވާހަކަ އަކަށެވެ. މިއީ ހިތާމަ ހުރި ކަމެކެވެ.
އަޅުގަނޑުގެ ހިތަށް އަރާ ސުވާލަކީ ސޯލާޕެނަލް ބަހައްޓަން ބެނުންވާ ބިން ހޯދަން ބިން ހިއްކާނީ ބާވައެވެ. އަދި ވިންޑް މިލް ވެސް ހަމަ މި ބީދައިން ބިން ހިއްކައިގެން ހަރު ކުރާނީ ތޯއެވެ. ނޫނީ ކުނިން ކަރަންޓު އުފައްދަން އިންޑިޔާ އިން ކުނި ގަނެގެން ނަމަވެސް ގެންނާނީ ބާވައެވެ. މިއީ ހައްތަހާވެސް އުފެދެން ނުޖެހޭ ނަމަވެސް އުފެދޭ ސުވާލު ތަކެވެ.
އަޅުގަނޑުވެސް މި ކަންކަމާއި މެދު ވަރަށް ވިސްނަމެވެ. އެހެންކަމުން އޮއި ބޭނުން ކޮށްގެން ކަރަނޓް އުފައްދާ ނިޒާމެއްގެ މަޢުލޫމާތު ހޯދަމުން ދަނިކޮށް އުއްމީދީ ކުރިއެރުމެއް ލިބުނެވެ. 40ސައުތް އެނާޖީ ނަމަކަށް ކިޔާ ކުންފުންޏަކުން މިކަން ފުރިހަމަ ގޮތެއްގައި އެބަ ކުރެއެވެ. އެމީހުންގެ ޕްރޮޖެކްޓެއް ރާއްޖޭގެ ޅަވިޔަނި އަތޮޅުގައި ރިސާޗް ހެދުމަށް ދޫކުރެވިފައިވާ ވައްވަރު އައިލޭޑްގައި ވަނީ ފަށަން ތައްޔާރުވެފައެވެ. 40ސައުތް އެނާޖީ އާއި ވައްވަރު ގްރޫޕް ގުޅިގެން ވޭވް އެނާޖީ ޕާކެއް ހަދަން ވަނީ އެއްބަސްވެފައެވެ. އެހެންވެ މިއީ އާދައިގެ ބައެއް ނޫންކަމަށް ނިންމީމެވެ.
40ސައުތް އެނާޖީއިން ބުނެފައި ވަނީ އެމީހުންގެ ސިސްޓަމަކީ ހުރިހާ ކަނޑަކާއި ފަޅެއްގައި ބޭނުން ކުރެވޭ ސިސްޓަމެއް ކަމަށާއި އަދި ފަސޭހަކަމާއި އެކު ޓްރާންސްޕޯޓް ކޮށް ހަރު ކުރެވޭ ސިސްޓަމެއް ކަމަށެވެ. 40 މީޓަރު އަޑީގައި ހަރުކުރެވޭ މި ސިސްޓަމަކީ ވަރަށް ކުޑަ މެއިންޓެނެންސް އެއް ބޭނުންވާ ސިސްޓަމެއް ކަމަށާއި އަދި މި ސިސްޓަމް ދިޔަވަރަށް އަންނަ ބަދަލުތަކަށް އޮޓަމެޓިކުން އެޖަސްޓް ކުރާނެ ކަމަށް ވެސް ބުނެފައި ވެއެވެ.
އެ ކުންފުނިން ތަފާތު ސައިޒުގެ ސިސްޓަމް ލިބެން ހުރި އިރު އޭގެ އެންމެ ބޮޑު ސިސްޓަމަކުން ދުވާލަކު 500 ކިލޯވަޓް އުފެއްދެ އެވެ.
އައްޑޫ ސިޓީގައި 40ސައުތް އެނާޖީގެ މި ސިސްޓަމް ބޭނުން ކޮށްގެން ކަރަންޓު އުފެއްދިދާނެތޯ ބެލުމަށް އެ ކުންފުންޏާއި ކުރެވުނު މުޢާމަލާތުގައި ، އެމީހުންނަށް އޮއި ބޭނުން ކޮށްގެން އައްޑޫ ސިޓީ އަށް ކަރަންޓު ދެވިދާނެ ކަމަށްވަނީ ބުނެފައެވެ. މިހާރުވެސް 40ސަައުތް އިން ދަނީ ރާއްޖޭގެ އިތުރުން އިޓަލީ އާއި އިނގިރޭސި ވިލާތުގައި ވެސް ވޭވް އެނާޖީ ޕާކް ތައް ހަދަމުންނެވެ.
މިއީ މި ސިޓީ ކާބަން ނިއުޓްރަލް ކުރުމަށް ކުރާ މަސަތްކަތުގައި މި ސިޓީއަށް އިޙްތިޔާރު ކުރެވިދާނެ އެއް މަގެވެ.
ކޮންމެއަކަސް މިއީ އަހަރެމެންނަށް ކުރެވިދާނެ ކަމެކެވެ. ބޭނުން ވަނީ ވަރުގަދަ ޢަޒުމަކާއި ހިއްވަރެކެވެ. މި ރޫޙު އަހަރެމެންގެ ކައުންސިލްގައި ހުރިކަން އެބޭފުޅުންގެ ވާހަކަފުޅު ތަކުން އެނގެ އެވެ. އެބޭފުޅުން ރެއާއި ދުވާލު ރައްޔިތުންގެ ހިޔާލާއި ފިކުރު ފޭސްބުކުން ބައްލަވަމުން އައްޑޫސިޓީގެ ތަރައްގީ އަށް ކެނޑި ނޭޅި މަސަތްކަތް ކުރަމުން ގެންދާ އިރު އަހަރެމެން ރައްޔިތުން އެބޭފުޅުންނަށް ޝުކުރު ވެރިވުން ޙައްގެވެ.
ވީމާ އައްޑޫގެ ރައްޔިތުން ވެސް މިފަދަ ކަންކަމުގައި އެއްބާރުލުން ދީގެން ކުރިއަށް ދާންވީ އެވެ. އެންމެންވެ ސް "ޑްރީމް" ކުރަންވީ އެވެ. ހަނދާން ވަނީ އައްޑު އަތޮޅުގެ މޮޅު ދަރިއެއްގެ ބަސް ކޮޅެކެވެ. "ޑްރީމް ކުރަން ބިރު ނުގަންނާށެވެ. ކެރިގެން ޑްރީމް ކުރާށެވެ."