ވިހި ވަނަ މަލިޖީހުގެ 70 އަށް ވުރެ ގިނަ ގޮނޑި ސަރުކާރުން ހިންގާ ކޯލިޝަނުން ކާމިޔާބު ކުރާނެ ކަމަށް ރައީސް ޑރ. މުހަމައްދުގެ މުއިއްޒުގެ އެޑްވައިޒަރު އަބްދުއްރަހީމް (އަދުރޭ) ޖެއްސެވި ހިސާބު މި ފަހަރު ވެސް ދިމާވެއްޖެ ކަމަށް ވިދާޅުވެ ފިޝަރީޒް މިނިސްޓަރު އަހުމަދު ޝިޔާމް އެ ކާމިޔާބީ ފާހަގަ ކުރައްވައިފި އެވެ.
މަޖިލީހުގެ ސުޕަ މެޖޯރިޓީ ޕީއެންސީ އަށް އިއްޔެ ކަށަވަރުވުމާ ގުޅިގެން ސޯޝަލް މީޑިއާ ޕޯސްޓެއްގައި އޭނަ ވިދާޅުވީ އަދުރޭގެ ހިސާބު ބަރާބަރަށް ދިމާވާ ކަމަށެވެ. ޝިޔާމު އެގޮތަށް ވިދާޅުވީ މިދިޔަ އަހަރު ނޮވެމްބަރު މަހުގެ ތެރޭގައި މީޑިއާއަކަށް ދެއްވި އިންޓަވިއުއެއްގައި ގޮނޑީގެ އަދަދާ ގުޅޭ ގޮތުން އަދުރޭ ދެއްވި އިންޓަވިއުއެއްގ ސުރުހީގެ ސްކްރީންޝޮޓަކާ އެކީގަ އެވެ.
ހިސާބު ބަރާބަރަށް އެބަދިމާވޭ الحمد الله.
20ވަނަ ރައްޔިތުންގެމަޖިލީހުގެ ގޮނޑިތައް ކާމިޔާބު ކުރެއްވި ސަރުކާރުގެ ހުރިހާ ކެންޑިޑޭޓުންނަށާ އެބޭފުޅުންގެ ޓީމްތަކަށް މަރުހަބާދަންނަވަން. މީ ރައީސް ޑރ. @MMuizzu އަށް ރައްޔިތުންގެ އޮތް ތާއީދާ އިތުބާރާ އުއްމީދު ދައްކުވައިދޭ އަލިގަދަ ހެއްކެއް pic.twitter.com/HKDfR7WAcO— Ahmed Shiyam (@Shiyamaldives) April 22, 2024
"ވިހި ވަނަ ރައްޔިތުންގެ މަޖިލީހުގެ ގޮނޑިތައް ކާމިޔާބު ކުރެއްވި ސަރުކާރުގެ ހުރިހާ ކެންޑިޑޭޓުންނަށާ އެ ބޭފުޅުންގެ ޓީމްތަކަށް މަރުހަބާދަންނަވަން. މިއީ ރައީސް ޑރ. މުހައްމަދު މުއިއްޒަށް ރައްޔިތުންގެ އޮތް ތާއީދާ އިތުބާރާ އުންމީދު ދައްކުވައިދޭ އަލިގަދަ ހެއްކެއް." ޝިޔާމު ވިދާޅުވި އެވެ.
މަޖިލީހުގެ ސުޕަ މެޖޯރިޓީ ޕީއެންސީން ހޯދި އިރު، އަދުރޭ ވެސް ވަނީ ފޮނަދޫ ދާއިރާ އަށް ވާދަކުރައްވައިގެން ގޮނޑި ކާމިޔާބު ކުރައްވައިފަ އެވެ. އޭނަ ކުރިން ވެސް އެ ދާއިރާގެ މެންބަރުކަން ކުރެއްވި އެވެ. އަދުރޭ އަކީ މިހާރުގެ ޓޫރިޒަމް މިނިސްޓަރު އިބްރާހީމް ފައިސަލްގެ ބައްޕަ އެވެ.