ނަމާދުކުރާ މީހުން ސިޔާސީ މަސައްކަތުގެ އިސް ސަފަށް ނެރުމުގެ މަސައްކަތުގައި ދެމި ހުންނާނެ ކަމަށް އަދާލަތު ޕާޓީގެ ރައީސް އިމްރާން އަބްދުﷲ ވިދާޅުވެއްޖެއެވެ.
ކުރީގެ ހޯމް މިނިސްޓަރުކަންވެސް ކުރެއްވި އިމްރާން އެކްސްގައި ކުރެއްވި ޕޯސްޓެއްގައި ވިދާޅުވީ މިހާތަނަށް ކުރަމުންއައި އަދި އެކަމެއް ކުރުމުގެ މަތީގައި ހަޔާތުގެ ބާކީ އޮތް ބައިގައި ދެމި ހުންނާނީ ފަސްވަގުތު ނަމާދުކުރާ މީހުން ސިޔާސީ މަސައްކަތުގެ އިސް ސަފަށް ނެރެ ބާރުވެރި ކުރުމުގެ މަސައްކަތް ކަމަށެވެ.
އަޅުގަޑު މިހާތަނަށް ކުރަމުން އައި ، އަދި އެކަމެއް ކުރުމުގެ މަތީގައި ހަޔާތުގެ ބާކީ އޮތް ބައިގައި އިންޝާ الله،ދެމި ހުންނާނެ މަސައްކަތަކީ ފަސްވަގުތު ނަމާދުކުރާ މީހުން ސިޔާސީ މަސައްކަތުގެ އިސް ސަފަށް ނެރެ ބާރުވެރި ކުރުމެވެ.
— Imran Abdulla (@ShimranAb) April 23, 2024
އިމްރާން މިހެން ވިދާޅުވިއިރު އޭނާ ވަނީ އެންމެފަހުން ބޭއްވި ރައްޔިތުންގެ މަޖިލީހުގެ އިންތިހާބުގައިވެސް ވާދަކުރައްވާފައެވެ.
މަކުނުދޫ ދާއިރާއަށް އިމްރާން ވާދަކުރެއްވިއިރު އޭނާއަށް ލިބިފައިވަނީ 821 ވޯޓެވެ. އެއީ ވޯޓުލީ މީހުންގެ 29.65 އިންސައްތައެވެ. އެ ގޮނޑި ކާމިޔާބު ކުރައްވާފައިވަނީ ޕީއެންސީގެ ޓިކެޓުގައި ވާދަކުރެއްވި އާދަމް ޝަފީގެވެ. އޭނާ އަށް 1223 ވޯޓު ލިބުނެވެ.