ކުޅުދުއްފުށީގައި ހުރި ކެމްޕެއިން އޮފީހެއްގައި ރޯކޮށްލި މައްސަލައިގައި ތުހުމަތުކުރެވޭ މީހާ ހައްޔަރު ކޮށްފައިވަނީ ރާއްޖެއިން ބޭރަށް ފިލަން އުޅެނިކޮށް އެއާޕޯޓުން ކަމަށް ފުލުހުން ބުނެފިއެވެ.
މިމަހުގެ 16 ވަނަ ދުވަހު ކުޅުދުއްފުށީގައި ރޯކޮށްލާފައިވަނީ ޕީއެންސީގެ ޓިކެޓުގައި ކުޅުދުއްފުށި ދެކުނު ދާއިރާ އަށް ވާދަކުރި ފަރުހަތު މުހައްމަދުގެ ކެމްޕެއިން އޮފީހެެއްގައެވެ. ރޯކޮށްލި ކަމަށް ތުހުމަތުކުރެވޭ މައްސަލައިގައި މީހަކު ހައްޔަރު ކޮށްފައިވަނީ މިދިޔަ ބުރާސްފަތި ދުވަހުއެވެ. ހައްޔަރު ކޮށްފައިވަނީ އުމުރުން 31 އަހަރުގެ އަންވަރު މުހައްމަދުއެވެ.
އޭނާގެ ބަންދު މުއްދަތު ޖެހުމަށް ކްރިމިނަލް ކޯޓަށް ހާޒިރުކޮށްފައިވަނީ އިއްޔެއެވެ.
ކޯޓުގައި ފުލުހުން ބުނެފައިވަނީ އޭނާއަށް ބައެއް ޒަހަމުތައް ލިބިފައިހުރި ކަމަށާއި އެ ޒަހަމުތަކަށް ފަރުވާ ހޯދުމަށް ކުޅުދުއްފުށީގައި ރަނގަޅު ފެންވަރުގެ ހޮސްޕިޓަލެއް ހުރިއިރު އެހެން ރަށަކަށް ގޮސް ފަރުވާ ހޯދާފައިވާ ކަމަށެވެ.
މައްސަލައިގައި ފުލުހަށް ހާޒިރުވުމަށް ޗިޓް ފޮނުވުމުންވެސް ހާޒިރުނުވާ ކަމަށާއި، އަދި މައްސަލައަށް ފިލައިގެން ރާއްޖެއިން ބޭރަށް ދާން ގޮސް ހުއްޓައި ހައްޔަރުކޮށްފައިވާ ކަމަށްވެސް ފުލުހުން ކޯޓުގައި ބުނެފައިވެއެވެ.
ފުލުހުންގެ ވާހަކަތަކުގެ ރަައްދުގައި އަންވަރު މުހައްމަދުގެ ފަރާތުން ކޯޓުގައި ބުނެފައިވަނީ އޭނާއަށް ޗިޓް ރައްދު ނުވާކަމަށާއި، ޗިޓާ ހަވާލުވީ އޭނާގެ ކޮއްކޮ ކަމަށެވެ. އަދި ޗިޓް ގެއަށް ލިބުނުކަން އޭނާއަށް ނޭންގޭ ކަމަށް ކޮއްކޮ ބުނާކަމަށްވެސް ދިފާއުން ފާހަގަ ކޮށްފައިވެއެވެ. މީގެއިތުރުން މީނާ ރަށުން ދިޔައީ ފިލަން ނޫން ކަމަށާއި ރާއްޖެއިން ބޭރަށްދާން ގޮސްހުރީ ދަރިފުޅު ޑޮކްޓަރަށް ދެއްކުމަށް ކަމަށްވެސް ބުނެފައިވެއެވެ.
މީނާގެ މައްޗަށް މި މައްސަލައިގައި ތުހުމަތު ކޮށްފައިވަނީ ގަސްތުގައި އަލިފާން ރޯކޮށް މުދަލަށް ބޮޑެތި ގެއްލުންދިން ކަމަށެވެ. ކްރިމިނަލް ކޯޓުން ވަނީ އޭނާގެ ބަންދަށް 10 ދުވަސް ދީފައެވެ.