މި އަހަރު ބާއްވަން ހަމަޖެހިފައި އޮތް 36 ވަނަ ގައުމީ ޤުރުއާން މުބާރާތް އަނެއްކާ ވެސް ފަސްކޮށްފި އެވެ.
އެންމެ ފުރަތަމަ މި އަހަރުގެ ފެބްރުއަރީ މަހު ބާއްވަން ތާވަލުކުރި މުބާރާތް އެންމެ ފަހުން ބާއްވަން ތާވަލުކުރި ތާރީހަކީ އަންނަ މަހުގެ 27 އެވެ. ނަމަވެސް މުބާރާތް އެ ތާރީހުގައި ނުބާއްވަން ނިންމާފައިވާ ކަމަށް އިސްލާމިކް މިނިސްޓްރީގެ ދަށުން ހިންގަމުން އަންނަ ކީރިތި ޤުރުއާބާ ބެހޭ މަރުކަޒުން ބުންޏެވެ.
މުބާރާތް ފަސްކުރިކަން އިއުލާންކޮށް ޤުރުއާނާ ބެހޭ މަރުކަޒުން ބުނީ މުބާރާތް ފަށަން މިހާރު ތާވަލުކޮށްފައި އޮތް އާ ތާރީހަކީ ޖޫން 29 ކަމަށެވެ. މި ފަހަރު މުބާރާތް ލަސްކުރީ އޯ ލެވެލް އިމްތިހާން މި ދުވަސްވަރު ކުރިއަށްދާތީ އެވެ. މި މަހުގެ 25 ގައި ފެށި އެ އިމްތިހާހު ޖޫން 13 އާ ހަމައަށް ކުރިއަށް ދާނެ އެވެ.
ގައުމީ ޤުރުއާން މުބާރާތަކީ 1981 އިން ފެށިގެން އިސްލާމިކް މިނިސްޓްރީން ދީނީ ގޮތުން ބާއްވަމުން އަންނަ އެންމެ ބޮޑު ހަރަކާތެވެ.
އެންމެ ފަހުން 2022 ގެ ފަހުކޮޅު ބޭއްވި 35 ވަނަ މުބާރާތުގައި 121 މުއައްސަސާއަކުން 1،022 ބައިވެރިން ވާދަކުރި އެވެ.