ކެމިކަލްގެ މާއްދާއެއް އިންޑިއާގެ ހަވާދު ބްރޭންޑްތަކުން ފެނުމާ ގުޅިގެން ރާއްޖޭގައި އެ ބްރޭންޑްތައް މަނާކޮށްފި އެވެ.
މިކަމާ ގުޅޭ ގޮތުން މޯލްޑިވްސް ފުޑް އެންޑް ޑްރަގް އޮތޯރިޓީ އެމްއެފްޑީއޭ) އިން ނެރުނު ބަޔާނެއްގައި ބުނީ ރާއްޖޭގައި ބޭނުން ކުރުމާއި ވިއްކުމާއި އެތެރެކުރިން މަނާކުރި ދެ ބްރޭންޑްތަކަކީ "އެވަރެސްޓް" އާއި "އެމްޑީއެޗް" ގެ ހަވާދު ކަމަށެވެ.
މި ދެ ބްރޭންޑްގެ ހަވާދުގެ ބައެއް ބާވަތްތަކުގައި އެތިލިން އޮކްސައިޑް ހުރި ކަމަށް ސިންގަޕޫރްގެ ފުޑް އެޖެންސީ އާއި ހޮންކޮންގުގެ ސެންޓަ ފޮ ފުޓް ސޭފްޓީން ވެސް ބުނެފައިވާތީ ރާއްޖޭގެ ބާޒާރުން ވެސް އެ ބްރޭންޑްތައް ނެގުމަށް އެފްޑީއޭ އިން ވަނީ އިލްތިމާސްކޮށްފަ އެވެ.
އެތަނުން ބުނީ ބުނީ އެތިލިން އޮކްސައިޑަކީ ދަނޑުވެރިކަމުގެ އުފެއްދުންތައް ފިއުމިގޭޓްކުރަން ބޭނުން ކުރާ ކެމިކަލެއް ކަމަށެވެ. އެހެންވެ ސިއްހަތަށް ކޮށްފާނެ ނޭދެވޭ އަސަރަކަށްޓަކައި އެ ކެމިކަލް ކާބޯތަކެތީގެ އުފެއްދުންތަކުގައި ބޭނުން ކުރުމަކި އެދެވިގެންވާ ކަމެއް ނޫން ކަމަށް އެމްއެފްޑީއޭ އިން ބުންޏެވެ.
އެތަނުން ބުނީ އެމްޑީއެޗާއި އެވަރެސްޓް މަސާލާ އަކީ ރާއްޖެ އަށް ގިނަ އަދަދަކަށް އެތެރެކޮށް ބޭނުން ކުރާ ބާވަތްތަކެއް ކަމަށެވެ. ނަމަވެސް އެ އުފެއްދުންތަކުގެ ހިރާސް ދެނެގަތުމަށް މަސައްކަތް މިހާރު ކުރިއަށްދާތީ ރައްކާތެރިކަމުގެ ފިޔަވަޅެއްގެ ގޮތުން އެ ބްރޭންޑްގެ ހަވާދުގެ އެއްވެސް މުއާމަލާތެއް ނުހިންގަން އެދިފައިވެ އެވެ.