އެމްޑީޕީގެ ކުލުދުއްފުށީ ގޮފީގެ ރައީސަކަށް ކުރީގެ ޓޫރިޒަން މިނިސްޓަރު އަލީ ވަހީދު އައްޔަންކޮށްފި އެވެ.
"ނަޔާ ކުޅުދުއްފުށި" ގެ ނަން ދީފައިވާ ގޮފީގެ ރައީސަކަށް އަލީ ވަހީދު އައްޔަންކުރި އިރު އޭނަ ވަނީ މި މަހު ބޭއްވި 20 ވަނަ މަޖިލިސް އިންތިހާބުގައި ކުޅުދުއްފުށީ ދެކުނު ދާއިރާ އަށް އެމްޑީޕީ ޓިކެޓްގައި ވެސް ވާދަ ވެސް ކުރައްވައިފަ އެވެ. އެކަމަކު ކުރީގެ ތޮއްޑޫ މެންބަރަށް ކުރިމަތިލައްވަން ޖެހިވަޑައިގަތީ ނާކާމިޔާބީއާ އެވެ.
އަލީ ވަހީދު މިދިޔަ އަހަރު އެމްޑީޕީއާ އަލުން ގުޅިވަޑައިގަތުމުގެ ކުރިން އޭނަ ހުންނެވީ ޖުމްހޫރީ ޕާޓީގަ އެވެ. އޭނަ އެންމެ ފުރަތަމަ އުޅުއްވީ ކުރީގެ ޑީއާރްޕީގަ އެވެ.
"ނަޔާ ކުޅުދުއްފުށި" ހެ ނައިބު ރައީސަކަށް އައްޔަންކުރީ ކައުންސިލް މެމްބަރު އާތިފާ އަލީ އެވެ.
އެ ގޮފި ހިންގުމަށް 29 މެމްބަރުން ހިމެނޭ ކައުންސިލެއް ވެސް ވަނީ އުފައްދައިފަ އެވެ. ގޮފީގެ ޕޮލިޓިކަލް ކައުންސިލްގެ ޗެއާއަކީ ކުރީގެ ރަށު ކައުންސިލު ރައީސް އަލީ މުހައްމަދެވެ. އިކޮނޮމިކް ކައުންސިލްގެ ރައީސަކީ ކުރީގެ ރަށު ކައުންސިލުގެ ރައީސް އަބްދުލް ލަތީފު ހަސަނެވެ.