އާޓިފިޝަލް ބީޗް ސަރަހައްދުގައި ހުރި، ދަ ޑިމޮކްރެޓްސްގެ ހަރުގެ "ހައުސް އޮފް ޑިމޮކްރެޓްސް" ހުސްކުރަން ފަށައިފި އެވެ.
ކުރީގެ ރައީސް މުހައްމަދު އިސްކޮށް ހުންނަވައިގެން މިދިޔަ އަހަރު އުފެއްދި ޕާޓީން ބުނީ ހަރުގެ ހުސްކުރަނީ ބިމުގެ ވެރިފަރާތުން އެތަން ބޭނުންވެގެން އެންގުމާ ގުޅިގެން ކަމަށެވެ. އެހެންވެ ޑިމޮކްރެޓްސްގެ ހަރުގެ އަލުން އަޅާނެ ތަނެއް މިހާރު ހޯދަމުން އަންނަ ކަމަށް ބުންޏެވެ.
"ހައުސް އޮފް ޑިމޮކްރެޓްސް" ހިންގަމުން އައި ތަނަކީ ކުރިން އެމްޑީޕީގެ ހަރުގެ ހިންގި ތަނެވެ. އެ ބިމުގެ ވެރިފަރާތަކީ އެ ޕާޓީގެ ކުރީގެ އެކްޓިވިސްޓެއް ކަމަށްވާ ޝަފިއްޔާ ޒުބައިރެވެ. އެމްޑީޕީ ތެރޭގައި ދެ ފެކްޝަން އުފެދި ކޯޅުން ބޮޑުވެފައި ވަނިކޮށް އެތަނުން އެމްޑީޕީގެ ހަރުގެ ހުސްކުރަން އެންގީ މިދިޔަ އަހަރުގެ މާޗް މަހުގެ ތެރޭގަ އެވެ.
މިދިޔަ އަހަރުގެ ރިޔާސީ އިންތިހާބުގައި ވެސް ވާދަކުރި ޑިމޮކްރެޓްސް އަކީ މި މަހު ބޭއްވި މަޖިލިސް އިންތިހާބުގައި ވެސް ވާދަކޮށް ސުމަކުން ދިޔަ ޕާޓީއެކެވެ.