މީގެ ތިން އަހަރު ކުރިން ޑައިރެކްޓަރު އަޒްހާން އިބްރާހީމް ގެނެސްދިން ކްރައިމް ތުރިލާ ޖޯންރާގެ މަގުބޫލު ވެބް ސީރީޒް "ދަރަކަ" ގެ ދެވަނަ ސީޒަނެއް ގެނެސްދޭން ތައްޔާރުވާން ފަށައިފި އެވެ.
އެ ސީރީޒް ގެނެސްދިން މީޑިއާނެޓުގެ އެމްއެސް ވީޑިއޯ ކުލަބުން މިއަދު ބުނީ ސީރީޒްގެ ދެވަނަ ސީޒަން ވަރަށް އަވަހަށް އަންނާނެ ކަމަށެވެ. "ދަރަކަ" އަކީ އަޒުހާން ލިޔެ، ޑައިރެކްޓްކޮށް، ކަޒްމިކް އިންޓަނޭޝަނަލްއާ ގުޅިގެން ގެނެސްދިން 8 އެޕިސޯޑްގެ އެއްޗެކެވެ. ކަޒްމިކް އަކީ މިދިޔަ އަހަރުގެ ޑާކް ކޮމެޑީ "ފްރީ ޑެލީވަރީ" ގެނެސްދިން ޕްރޮޑަކްޝަން ހައުސް އެވެ.
"ދަރަކަ" ގެ ކާސްޓްގައި ވާޝިޔާ މުހައްމަދު، އިބްރާހީމް ޖިހާދު (ޖިމީ)، އިފްނާޒް ފިރާގު، ނަތާޝާ ޖަލީލު، އަލީ އުސާމް (ދޮނާ) އާއި އައިޝަތު އަލީގެ އިތުރުން ސޫޒަން އިބްރާހިމްފުޅު ހިމެނެ އެވެ.
މި ސީރީޒްގެ އިތުރުން މިދިޔަ އަހަރު އަޒްހާން ވަނީ "މިރާއީ" ގެ ނަމުގައި ބައިސްކޯފަށް ވެސް ސީރީޒެއް ގެނެސްދީފަ އެވެ.
މި އަހަރު އޮލިމްޕަހުގައި އެޅުވި ފުރަތަމަ ފިލްމު "މީ އިޝްގް" އަކީ އޭނަގެ ފުރަތަމަ ފީޗާ ފިލްމެވެ.