މިހާރު ދައުރު ހަމަވާން ގާތްވަމުން އަންނަ 19 މަޖިލީހުގެ ފަހު ޖަލްސާ އަންނަ މަހުގެ 13 ގައި ބާއްވަން ނިންމައިފި އެވެ.
މަޖިލީހުގެ އިއްޔެގެ ޖަލްސާ ނިންމަވާލައްވަމުން ރައީސް އަދި ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ވިދާޅުވީ 19 ވަނަ މަޖިލީހުގެ ދައުރު އަންނަ މަހަށް ހަމަވާނެ ކަމަށެވެ. އެގޮތުން އެންމެ ފަހު ޖަލްސާ އޮންނާނީ އަންނަ މަހުގެ 13 ގައި ކަމަށް އިއުލާންކުރެއްވި އެވެ. މަޖިލީހުގެ މި ދައުރު ހަމަވާތީ އަންނަ މަހުގެ 9 ވަނަ ދުވަހުގެ ކުރިން ކޮމިޓީގެ މަސައްކަތްތައް ނިންމުމަށް ފަހު ކޮމިޓީ ރިޕޯޓްތައް ފޮނުއްވައި ދެއްވުމަށްވެސް ކޮމިޓީތަކުގެ މުގައްރިރުންނާއި މެންބަރުންގެ ކިބައިން އަސްލަމް އެދިވަޑައިގަތެވެ.
ނަވާރަ ވަނަ ރައްޔިތުންގެ މަޖިލީހުގެ މެންބަރުން ހުވާ ކުރެއްވުމާއި ރިޔާސަތަށް ބޭފުޅުން ކަނޑައެޅުމަށް ފުރަތަމަ ޖަލްސާ ބޭއްވީ މެއި 28، 2019 ގައެވެ. މި މަޖިލީހުގައި 87 މެންބަރުން ތިއްބވަ އެވެ. އަދި 19 ވަނަ މަޖިލީހުގެ ފުރަތަމަ ރައީސަކީ މައްޗަށްގޮޅި މެދު ދާއިރާގެ މެންބަރު އަދި ކުރީގެ ރައީސުލްޖުމްހުރިއްޔާ މުހައްމަދު ނަޝީދެވެ. ނައިބު ރައީސަކީ ގަލޮޅު އުތުރު ދާއިރާގެ މެންބަރު އީވާ އަބްދުﷲ އެވެ.
ނަމަވެސް ފަހުން މި ދެ ބޭފުޅުން މަގާމުން އިސްތިއުފާ ދެއްވުމާ ގުޅިގެން ދައުރު ނިމެން ކައިރިވިއިރު މަޖިލީހުގެ ރައީސަކީ އަސްލަމެވެ. އަދި ނައިބު ރައީސަކީ ހޯރަފުށި ދާއިރާގެ މެންބަރު އަހުމަދު ސަލީމް އެވެ.
ނަވާރަ ވަނަ މަޖިލީހުގައި އެމްޑީޕީ އަށް ކުރިން ސުޕަ މެޖޯރިޓީ އޮތް ނަމަވެސް އެމްޑީޕގެ ތެރޭގައި ދެ ފެކްޝަން އުފެދި، އެ ޕާޓީގެ މަޖިލިސް މެންބަރުންތަކެއް ޕާޓީން ވަކިވެވަޑައިގަތުމާ ގުޅިގެން ސުޕަ މެޖޯރިޓީ ގެއްލުނެވެ. އެމްޑީޕީ ދޫކޮށްލެއްވި މަޖިލިސް މެންބަރުން ފަހުން ދަ ޑިމޮކްރެޓްސްގެ ނަމުގައި ޕާޓީއެއް އުފެއްދެވި އެވެ. އެއީ ނަޝީދު އިސްކޮށް ހުންނަވައިގެންނެވެ.
މި މަހުގެ 21 ގައި ބޭއްވި 20 ވަނަ މަޖިލިސް އިންތިހާބު ކާމިޔާބު ކުުރެއްވި މެންބަރުން ހުވާކުރައްވަން ހަމަޖެހިފައި ވަނީ އަންނަ މަހުގެ 28 ގަ އެވެ. މި އާ މަޖިލީހުގައި 93 މެންބަރުން ތިއްބަވާނެ އެވެ. އާ މަޖިލީހުގެ ސުޕަ މެޖޯރިޓީ ވެރިކަން ކުރާ، ޕީއެންސީ އަށް ވަނީ ލިބިފަ އެވެ. އެއީ 73 ގޮނޑިއާ އެކީގަ އެވެ.