ޔޫރަޕްގެ އެންމެ ބޮޑު ބޭންކް ކަމަށްވާ އެޗްއެސްބީސީ ގްރޫޕްގެ ޗީފް އެގްޒެކެޓިވް ނޮއެލް ކްއިން ރިޓަޔާކުރައްވަން ނިންމަވައިފި އެވެ.
އުމުރުން މިހާރު 62 އަހަރުގެ ކްއިން ރިޓަޔާކުރައްވަން ނިންމެވި އިރު، އޭނަ އެ މަގާމާ ހަވާލުވެވަޑައިގެންނެވީ މީގެ ފަސް އަހަރު ކުރިންނެވެ. ކްއިން ރިޓަޔާކުރައްވަން ނިންމެވުމާ ގުޅިގެން އެޗްއެސްބީސީ ގްރޫޕްގެ ބޯޑުން މިހާރު އަންނަނީ ޗީފް އެގްޒެކެޓިވްގެ މަގާމަކަށް ބޭފުޅަކު ހޯދަމުންނެވެ. އެގޮތުން އާ ބޭފުޅަޅު މަގާމާ ހަވާލުވެވަޑައިގަންނަވަންދެން ކްއިިން މަގާމުގައި ދެމިހުންނަވާނެ އެެވެ.
އޭނަ ވިދާޅުވީ މި ވަގުތަކީ ރިޓަޔާކުރައްވައި އަމިއްލަ ދިރިއުޅުން ބެލެންސް ކުރައްވަން އެންމެ ރަނގަޅު ދަނޑިވަޅު ކަމަށް ގަބޫލު ކުރައްވާ ކަމަށެވެ.
ކްއިން އެޗްއެސްބީސީގެ ޗީފް އެގްޒެކެޓިވްއަކަށް އައްޔަން ކުރީ 2019 ގަ އެވެ. އެއީ އޭރު އެ މަގާމުގައި ހުންނެވި ޖޯން ފްލިންޓް މަގާމުން ވަކިކުރުމާ ގުޅިގެންނެވެ. އެޗްބީސީން ރިޓަޔަކުރައްވަން ކްއިން ނިންމެވި އިރު، އެތަނުގައި އޭނަ މަސައްކަތްކުރައްވާތާ މިހާރު 37 އަހަރުވެއްޖެ އެވެ.
ހެޑްކުއާޓަރު އިނގިރޭސިވިލާތުގެ ލަންޑަންގައި ހުންނަ އެޗްއެސްބީސީގެ ބްރާންޗްތައް ދުނިޔޭގެ އެކި ހިސާބުތަކުގައި ހިންގަ އެވެ. އޭގެ ތެރޭގައި ރާއްޖެ ވެސް ހިމެނެ އެވެ. އެޗްއެސްބީސީގެ ބްރާންޗްތަކުގެ އަދަދު 2،580 އަށް އަރަ އެވެ. އަދި ކުންފުނީގެ މުވައްޒަފުންގެ އަދަދު 221،000 އަށް ވުރެ ގިނަ އެވެ.