މިދިޔަ އަހަރުގެ ނޮވެމްބަރު މަހުގެ ތެރޭގައި ފޮރިން މިނިސްޓްރީގެ ސްޓޭޓް މިނިސްޓަރަކަށް އައްޔަންކުރިތާ ހަތަރު ދުވަސް ފަހުން މަގާމުން ވަކިކުރި މުހައްމަދު ފަހުމީ ހަސަން އަނެއްކާ ވެސް އެ މިނިސްޓްރީގެ ގެ އިސް މަގާމަކަށް އައްޔަންކޮށްފި އެވެ.
ކުރިން ސާވިސް ކޮމިޝަން (ސީއެސްސީ) ގެ ރައީސްކަން ވެސް ކުރެއްވި ފަހުމީ ސްޓޭޓް މިނިސްޓަރަކަށް އައްޔަންކުރީ ނޮވެމްބަރު 20، 2023 ގަ އެވެ. އަދި އޭނަ މަގާމުން ވަކިކުރީ ނޮވެމްބަރު 24، 2023 ގަ އެވެ.
ފަހުމީ އަނެއްކާ ވެސް ފޮރިން މިނިސްޓްރީގެ މަގާމަކަށް ވަނީ އައްޔަންކޮށްފަ އެވެ. ނަމަވެސް އެކަމާ ގުޅޭ ތަފުސީލެއް އަދި ނުލިބެ އެވެ.
ފުވައްމުލަކަށް އުފަން ފަހުމީ އަކީ އޭނަ ސީއެސްސީގެ ރައީސްގެ މަގާމުގައި ހުންނެވި އިރު، ޖިންސީ ފުރައްސާރައިގެ މައްސަލައަކާ ގުޅިގެން ވަކިކުރި މީހެކެވެ. އޭނަ އަށް މި ސަރުކާރުން މަގާމެއް ދިނުމުން ފާޑުކިޔުންތަކެއް އަމާޒުވީ ވެސް އެކަމާ ހެދި އެވެ.
ދާދި ފަހުން ސަރުކާރުން ވަނީ ކުރިން ޓޫރިޒަމް މިނިސްޓްރީ އަށް މި ސަރުކާރުން އައްޔަންކުރި ފުވައްމުލަކު މީހަކު މަގާމުން ވަކިކޮށްފައި ވަނިކޮށް އަލުން ވަޒީފ ދީފަ އެވެ. އެއީ އެ މިނިސްޓްރީގެ ސްޓޭޓް މިނިސްޓަރުކަން ދިން މުނިމް އަނީސް އެވެ.