ކިޑްނީ ބަލީގެ މީހުންނަށް ދޭ ޑައިލިސިސް ފަރުވާ ހިދުމަތް މި އަހަރު ހުރިހާ މުޅި ރާއްޖެ އަށް ފުޅާ ކުރަން ނިންމާފައިވާ ކަމަށް ހެލްތު މިނިސްޓަރު ޑރ. އަބްދުﷲ ހަލީލު ވިދާޅުވެއްޖެ އެވެ.
މަޖިލީހުގެ މިއަދުގެ ޖަލްސާގައި ހޯރަފުށީ ދާއިރާގެ މެމްބަރު އަހުމަދު ސަލީމް ކުރެއްވި ސުވާލެއްގެ ޖަވާބުގައި މިނިސްޓަރު ވިދާޅުވީ ސަރުކާރުގެ މައި ހޮސްޕިޓަލް އައިޖީއެމްއެޗަށް އޮތް ޑިމާންޑު ކުޑަ ކުރުމަށް އެކި މަސައްކަތްތައް ކުރަމުން އަންނަ ކަމަށެވެ. އެގޮތުން އަތޮޅު އަދި ރީޖަނަލް ހޮސްޕިޓަލްތަކުގެ ފެންވަރު ރަނގަޅުކޮށް، އާ ހިދުމަތްތައް ފެށުމަށް މަސައްކަތް ކުރައްވަމުން ގެންދަވާ ކަމަށް ވިދާޅުވި އެވެ.
އެގޮތުން ކުރިން ރީޖަނަލް ހޮސްޕިޓަލްތަކުން ނުލިިބޭ އެމްއާރުއައި އާއި ސީޓީ ސްކޭންގެ އިތުރުން އަދި ޑައިލިސިސް ހިދުމަތް ހުރިހާ އަތޮޅަކަށް ފުޅާކުރާނެ ކަމަށް ވިދާޅުވި އެވެ.
"އަޅުގަނޑުމެން މި ބަލަނީ މި އަހަރުގެ ތެރޭގައި ހުރިހާ އަތޮޅު ހޮސްޕިޓަލެއްގައި ޑައިލިސިސްގެ ހިދުމަތް ފެށިގެން ދާނެ ކަމަށް، ހަލީލު ވިދާޅުވި އެވެ. "ހަމައެއާއެކު، އައްޑޫ އިކުއިޓޯރިއަލް ހޮސްޕިޓަލާއި ތިނަދޫގައި ހުރި ރީޖަނަލް ހޮސްޕިޓަލާއި ކުޅުދުއްފުށީ ރީޖަނަލް ހޮސްޕިޓަލް، ރ. އުނގޫފާރު ރީޖަނަލް ހޮސްޕިޓަލް، މި ތަންތަނުގައި ހިދުމަތް ރަނގަޅުކުރުމަށްޓަކައި ހާއްސަ ޕްލޭނެއްގެ ދަށުން މަސައްކަތްތައް ކުރިއަށް އެބަ ގެންދަން."
ޑައިލިސިސްގެ ހިދުމަތް މިހާރު ލިބޭ ތަންތަނުގެ ތެރޭގައި ހިމެނެނީ އައިޖީއެމްއެޗާއި ހުޅުމާލެ އާއި ވިލިމާލެ ހޮސްޕިޓަލުގައި އިތުރުން އިތުރުން އައްޑު އާއި ފުވައްމުލަކާއި ގދ. އަތޮޅާއި ހދ. ރ. އަތޮޅުގެ އިތުރުން ބ. އަތޮޅު އަދި ޅ. އަތޮޅެވެ.