މިދިޔަ އަހަރު މަސައްކަތް ފެށި ރާޖްކުމާރު ރާއޯ އާއި ޓްރިޕްތީ ދިމްރީގެ ފިލްމު "ވިކީ ވިދިއާ ކާ ވޯ ވާލާ ވީޑިއޯ" ގެ ޝޫޓިން ނިންމާލައިފި އެވެ.
މި ފިލްމަކީ އެކްތާ ކަޕޫރާއި ބުޝަން ކުމާރުގެ ޓީ ސީރީޒް ގުޅިގެން ޕްރޮޑިއުސްކޮށް، ރާޖް ޝާންޑަލިޔާ ލިޔެ ޑައިރެކްޓްކޮށްދޭ މަސާލާ އެންޓައިޓައިނާއެކެވެ. "ވިކީ ވިދިއާ ކާ ވޯ ވާލާ ވީޑިއޯ" ގައި ދައްކުވައި ދޭނީ 90 ގެ އަހަރުތަކުގެ ހެއްވާ މަޖާ ހާދިސާތަކެކެވެ.
ރާޖް އަކީ އަޔޫޝްމަން ކްރާނާ އެކީ ވަރަށް ކާމިޔާބު ފިލްމުތަކެއް ކަމަށްވާ "ޑްރީމް ގާލް" ގެ ދެ ފިލްމު ގެނެސްދިން ޑައިރެކްޓަރެވެ.
"ވިކީ ވިދިއާ ކާ ވޯ ވާލާ ވީޑިއޯ" އަކީ ނެޝަނަލް އެވޯޑް ހޯދާފައިވާ އެކްޓަރު ރާޖް އާއި ޓްރިޕްތީ އެކީގައި ކުޅުނު ފުރަތަމަ ފިލްމެވެ. މިދިޔަ އަހަރު ރިލީޒްކުރި ރަންބީރް ކަޕޫރްގެ "އެނިމަލް" ގައި ކުޅުނު ރޯލުން ބޮޑު މަޝްހޫރު ކަމެއް ލިބުނު އުންމީދީ ބަތަލާ ޓްރިޕްތީގެ ކުރިއަށް ހުރި ފިލްމުތަކުގެ ތެރޭގައި ދަރުމާ ޕްރޮޑަކްޝަންގެ "ބޭޑް ނިއުސް" އާއި ޓީ ސީރީޒްގެ "ބޫލް ބުލައްޔާ 3" ހިމެނެ އެވެ.
އެ ދެ ފިލްމު ވެސް މި އަހަރު ރިލީޒްކުރަން ހަމަޖެހިފައިވާ އިރު، "ވިކީ ވިދިއާ ކާ ވޯ ވާލާ ވީޑިއޯ" ސިނަމާތަކަށް އަންނާނީ އޮކްޓޯބަރު 11 ގަ އެވެ.
އަންނަ މަހު ރާޖްގެ ދެ ފިލްމެއް ސިނަމާތަކަށް އަންނާނެ އެވެ. އެއީ މެއި 10 އަށް ތާވަލުކޮށްފައި އޮތް ބައޮގްރަފިކަލް ފިލްމު "ސްރީކާންތު" އާއި މެއި 31 އަށް ތާވަލުކޮށްފައި އޮތް ރޮމޭންޓިކް ސްޕޯޓްސް ޑްރާމާ "މިސްޓަ އެންޑް މިސިޒް މާހީ" އެވެ.