ޕްލާސްޓިކް ކުނި މެނޭޖު ކުރުމަށް ހާއްސަކޮށްގެން މާލެ ސަރަހައްދަށް ތިމާވެއްޓާ ރައްޓެހި ވެހިކަލްތަކެއް ވެމްކޯގެ ފްލީޓަށް އިތުރުކޮށްފި އެވެ.
އެ ކުންފުންޏާ އެ ދެ ހަވާލުކުރީ ޔޫއެންޑީޕީންނެވެ. އަދި އެކަމަށް ބޭނުންވާ މާލީ އެހީތެރިކަން ފޯރުކޮށް ދިނީ ކޮކަ-ކޯލާ ފައުންޑޭޝަނުންނެވެ.
ވެމްކޯގެ ފްލީޓަށް އިތުރުކުރި ތިމާވެއްޓާ ރައްޓެހި އިލެކްޓްރިކް ދެ ވެހިކަލާ އެކު އެ ޒާތުގެ ޖުމްލަ ހަ ވެހިކަލް މިހާރު އޮންނާނެ އެވެ. އެ ވެހިކަލްގެ އެހީގައި މާލެ ސަރަހައްދުގައި ޕްލާސްޓިކްގެ އެކި ބާވަތްތަކުގެ ކުނި އެއްކުރުމާއި މުޅި ރާއްޖޭގެ ޕްލާސްޓިކް ކުނީގެ މައްސަލައާ ދެކޮޅަށް ކުރާ މަސައްކަތްތަކަށް އިތުރު ކުރިއެރުންތަކެއް ލިބޭނެ ކަމަށް ވެމްކޯ އިން ބުންޏެވެ.