ރާއްޖެ އާއި އިންޑިއާ ދެމެދު ވިޔަފާރި އާއި އިގުތިސާދީ ދާއިރާއިން ގުޅުން ބަދަހިކުރުމާ ގުޅޭ ގޮތުން މަޝްވަރާކޮށްފި އެވެ.
އިކޮނޮމިކް މިނިސްޓްރީން އެ މަޝްވަރާ ކުރިއަށް ގެންދިޔައީ މިނިސްޓަރު މުހައްމަދު ސައީދާއި އިންޑިއާ އިން ރާއްޖެ އަށް ކަނޑައަޅާފައި ހުންނަވާ ސަފީރު މުނު މަހާވާރާ ދެމެދު އެވެ. މަޝްވަރާތަކުގެ ތަފުސީލެއް ހާމަނުކުރެއްވި ނަމަވެސް މަޝްވަރާ ކުރެވުނު ވާހަކަ މިނިސްޓަރު ސޯޝަލް މީޑިއާގައި މިއަދު ހިއްސާކުރައްވާފައިވެ އެވެ.
ރާއްޖެ އާއި އިންޑިއާއާ ދެމެދު އަބަދު ވެސް ވަރަށް ގާތް ގުޅުމެއް އޮވެ އެވެ. އަދި އެ ގައުމަކީ އަބަދު ވެސް އެކި ދާއިރާތަކުން ރާއްޖެ އެހީވަމުން އަންނަ އެންމެ އަވައްޓެރި އެއް ގައުމެވެ.
Minister @em_saeed met with Indian High Commissioner to Maldives, H. E. Munu Mahawar, and discussed potential areas for trade & economic cooperation.@HCIMaldives pic.twitter.com/QaubOLBMId
— Ministry of Economic Development and Trade (@MoEDmv) May 1, 2024
މިދިޔަ މާޗް މަހު އިންޑިއާ އިން ވަނީ މި އަހަރާއި އަންނަ އަހަރަށް ރާއްޖެ އަށް ބޭނުންވާ އަސާސީ ކާބޯތަކެއްޗާއި ހިލަވެލީގެ ކޯޓާ ވެސް ރާއްޖެ އަށް އިތުރުކޮށް ދޭން ނިންމައިފަ އެވެ.
ރާއްޖޭގެ އިގުތިސާދު ޓޫރިޒަމަށް ބިނާވެފައިވާ އިރު، އިންޑިއާ އަކީ މިހާރު ރާއްޖެ އަށް އެންމެ ގިނަ ޓޫރިސްޓުން އަންނަ 10 ގައުމުގެ ތެރޭގައި ހިމެނޭ ގައުމެކެވެ. ނަމަވެސް ޑރ. މުހައްމަދު މުއިއްޒު ވެރިކަމަށް ވަޑައިގަތް ފަހުން އިންޑިއާ އާއި ރާއްޖެއާ ދެމެދު އޮތް ގުޅުމަށް ހީނަރުކަން އައިސްފައިވެ އެވެ. އޭގެ ސަބަބުން އިންޑިއާ އިން ރާއްޖެ އަންނަ ޓޫރިސްޓުންގެ އަދަދު ވަރަށް ބޮޑަށް މަދުވެފައިވެ އެވެ.
އެކަމާ ގުޅިގެން ސަރުކާރުން ބުނެފައި ވަނީ އިންޑިއާ އަކީ ރާއްޖެ އަށް ވަރަށް މުހިއްމު މާކެޓެއް ކަމަށާއި އެ ގައުމުގެ ޓޫރިސްޓުން އިތުރު ކުރަން މަސައްކަތްތަކެއް ކުރެވެމުން އަންނަ ކަމަށެވެ.