ރާއްޖޭގެ ކޮންމެ މަސައްކަތްތެރިއަކަށްވެސް ހައްޤުވާ އިހުތިރާމު އެންމެ ފުރިހަމަ މާނާގައި ލިބިދެވޭނެ ގޮތަށް ސިޔާސަތުތަކާއި އުސޫލުތައް ބައްޓަންކޮށް އަމަލުކުރުމަށް މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ޑރ. މަރިޔަމް މާރިއާ އިލްތިމާސް ކުރައްވައިފިއެވެ.
ބައިނަލްއަޤްވާމީ މަސައްކަތްތެރިންގެ ދުވަހުގެ މުނާސަބުގައި ދެއްވި ޚިތާބުގައި މިނިސްޓަރު މާރިޔާ ވިދާޅުވީ ރާއްޖޭގައި ބައިނަލްއަޤްވާމީ މަސައްކަތްތެރިންގެ ދުވަސް ރަސްމީކޮށް ފާހަގަ ކުރާތާ 15 އަހަރު ވެފައިވާ ކަމަށާއި ވޭތުވެދިޔަ 15 އަހަރު ދުވަހު މަސައްކަތުގެ މާހައުލުގެ ރައްކާތެރިކަމާއި ސިއްހަތު ކަށަވަރުކުރުމަށް ކުރިއެރުންތަކެއް ލިބިފައިފައިވާ ކަމަށެވެ. އެގޮތުން، ޤާނޫނީ އޮނިގަނޑުގެ ތެރެއިން މަސައްކަތުގެ މާހައުލުގެ ރައްކާތެރިކަމާއި ސިއްހަތު ކަށަވަރުކުރުމުގެ ހައްޤު މިހާރު ލިބިފައިވާކަމަށެވެ.
މިނިސްޓަރު މާރިޔާ ވިދާޅުވީ އަބުރުވެރި މަސައްކަތުގެ މުހިންމު ކަމާއި އޭގެ ސަބަބުން ފަރުދުންގެ ދިރިއުޅުމަށާއި، ޤައުމުގެ ތަނަވަސްކަމަށް ކުރާނެ އަސަރުތަކާމެދު މިއަދު ވިސްނާލަންޖެހޭ ކަމަށެވެ.
"މަސައްކަތްތެރިންގެ ދުވަހު، އަޅުގަނޑުމެން ހަނދާނަށް ގެންނަން އެބަޖެހޭ އިންސާފުވެރި އުޖޫރަޔާ ދޭތެރޭ. ރައްކާތެރި މަސައްކަތުގެ މާހައުލާ ދޭތެރޭ. އަބުރުވެރި ވަޒީފާއެއް ހޯދުމުގެ ފުރުސަތު ހިމެނޭ ގޮތަށް، މަސައްކަތްތެރިންގެ އަސާސީ ހައްގުތައް ހިމާޔަތް ކުރުމާ މެދު. ދިވެހިރާއްޖޭގައި، މަސައްކަތުގެ އިޖްތިމާއީ އަދުލުވެރިކަމާއި، އިޤްތިސާދީ ކުރިއެރުމާއި، ދެމެހެއްޓެނިވި ތަރައްޤީ އާލާކުރުމުގައި، އަބުރުވެރި މަސައްކަތްތައް އަދާކުރާ ވަރަށް މުހިންމު ދައުރެއްވާކަމަށް އަޅުގަނޑުމެން ޤަބޫލުކޮށް، ދެނެގަންނަން އެބަޖެހޭ." މިނިސްޓަރު މާރިޔާ ވިދާޅުވިއެވެ.
މިނިސްޓަރު މާރިޔާ ވިދާޅުވީ ރާއްޖޭގެ ކޮންމެ މަސައްކަތްތެރިއަކަށްވެސް، އެމީހަކަށް ހައްޤުވާ ކަރާމާތާއި އިހުތިރާމް ލިބިދިނުމަކީ ސަރުކާރުގެ ވަރައްބޮޑު އަމާޒެއް ކަމަށެވެ. އެހެންކަމުން މަސައްކަތްތެރިންނަށް ހައްޤުވާ އިހުތިރާމު އޭގެ ފުރިހަމަ މާނާގައި، އެފަރާތްތަކަށް ލިބިދެވޭނެ ގޮތަށް، ސިޔާސަތުތަކާއި އުސޫލުތައް ބައްޓަންކޮށް އެކަންކަން އަމަލުން ދެއްކުމަށް އިލްތިމާސް ކުރެއްވިއެވެ.
މިނިސްޓަރު ވިދާޅުވީ ތަފާތުކުރުމާއި އަނިޔާވެރިކަމާ ދެކޮޅަށް ކުރިމަތިލައި، އެކަންކަން މަސައްކަތުގެ މާހައުލުން ނައްތާލުމަށް މަސައްކަތް ކުރުމަކީ، އެންމެންގެ ވާޖިބެއްކަމަށް ހަދަންޖެހޭ ކަމަށެވެ.
މީގެއިތުރުން އެއްބައިވަންތަކަމާއި އެއްބާރުލުމުގެ ރޫހެއްގައި، ސަރުކާރުގެ އިދާރާތަކާއި، ވަޒީފާދޭ ފަރާތްތަކާއި، ޓްރޭޑް ޔޫނިއަންތަކާއި، މަދަނީ ޖަމްއިއްޔާތައް ގުޅިގެން ރާއްޖޭގައި މަސައްކަތުގެ މާހައުލުގެ ރައްކާތެރިކަމާއި ސިއްހީކަންކަން ކަށަވަރުކޮށް، އަބުރުވެރިކަމުގެ މަސައްކަތުގެ މަޤްސަދުތައް ކުރިއަށް ގެންދިއުމަށް ވެސް މިނިސްޓަރު މާރިޔާ ގޮވާލައްވާފައިވެއެވެ.