ފަރުބަދަތަކެއްގެ މަތިން ހަދާފައި އޮތް ހައިވޭއެއްގެ ބައެއް ވެއްޓި ޗައިނާ ގުއަންޑަން ޕްރޮވިންސުން މިއަދު 24 މީހަކު މަރުވެ، ޒަހަމްވި ގިނަ އަދަދަކަށް ބަޔަކަށް ފަރުވާ ދޭން ފަށައިފި އެވެ.
މީޑިއާތަކުން ބުނީ މި ހާދިސާ ހިނގާފައި ވަނީ މޫސުން ވެސް ވަރަށް ބޮޑަށް ގޯސްވެފައި ވަނިކޮށް ކަމަށެވެ. ތާރު އަޅައިގެން ދެ ލޭނަކަށް ހަދާފައި އޮތް ހައިވޭގެ އެއް ލޭނުން ބައެއް ވެއްޓި ހިނގި ހާދިސާގައި ޒަހަމްވި މީހުންގެ އަދަދު 30 އަށް އަރަ އެވެ. އަދި މި ހާދިސާ ހިނގުމާ ގުޅިގެން އެ ސަރަހައްދުން އިތުރު 500 މީހަކު ސަލާމަތްކޮށްފައިވެ އެވެ.
ހައިވޭގެ ބައެއް ހަލާކުވެގެން ވެއްޓުނު އިރު، އެ ހާދިސާގައި ވިއްސަކަށް ވެހިކަލް ވެއްޓިފައިވެ އެވެ. މި ހާދިސާ މިހާރު ތަހުގީގު ކުރަމުން އަންނަ އިރު، މިކަން ދިމާވި ސަބަބެއް އަދި ސާފުނުވާ ކަމަށް ކަމާބެހާ އިދާރާތަކުން ވަނީ ބުނެފަ އެވެ.
މިދިޔަ ހަފުތާ އިން ފެށިގެން ގުއަންޑަން ޕްރޮވިންސަށް ބޯކޮށް ވާރޭ ވެހުމުގެ ސަބަބުން އެ ޕްރޮވިންސްގެ އެކި ހިސާބުތަކުގައި ފެންބޮޑުވެފައިވެ އެވެ. ފެންބޮޑުވުމާ ގުޅިގެން މިހާތަނަށް ހަތަރު މީހަކު މަރުވެފައިވެ އެވެ.