ގިނަ ބައެއްގެ މެދުގައި ބޮޑު މަގުބޫލު ކަމެއް ހޯދި "ދަ ނިއު ޔޯކް ޓްރިލޮޖީ" ވާހަކައިގެ ލިޔުންޔެރިޔާ ޕޯލް އޮސްޓާ މަރުވެއްޖެ އެވެ.
އެމެރިކާ އަށް އުފަން ކުޅަދާނަ ލިޔުންޔެރިޔާ އުމުރިން 77 އަހަރުގައި އިއްޔެ މަރުވީ ފުއްޕާމޭގެ ކެންސަރު ބަލީގަ އެވެ. ލިޔުންތެރިކަމުގެ ދާއިރާ އިން އެތައް އެވޯޑެއް ވެސް ހާސިލުކޮށްފައިވާ ޕޯލް ގެނެސްދިން މަޝްހޫރު ބައެއް ވާހަކަތަކުގެ ތެރޭގައި "4321"، "ސަންސެޓް ޕާކް"، "ދަ ބުކް އޮފް އިލޫޝަންސް" އަދި "މޫން ޕެލަސް" ހިމެނެ އެވެ.
އޭނަގެ "ދަ ނިއު ޔޯކް ޓްރިލޮޖީ" ގައި ހިމެނޭ ތިން ވާހަކަ އަކީ ސިޓީ އޮފް ގްލާސް (1985)، ގޯސްޓްސް (1986) އަދި ދަ ލޮކްޑް ރޫމް (1986) އެވެ.
ޕޯލް ވަނީ ގިނަ އަދަދެއްގެ ފިކްޝަންގެ އިތުރުން ނަން-ފިކްޝަން ވާހަކަތަކެއް ވެސް ލިޔެފަ އެވެ. ސްކްރީން ރައިޓަރެއްގެ ގޮތުންނާއި ޅެންވެރިއއްގެ ގޮތުގައި ވެސް މަސައްކަތްކޮށްފައިވާ ލިޔުންތެރިޔާ ވަރަށް ގިނަ އަދަދެއްގެ ފޮތް އިނގިރޭސި ބަހަށް ތަރުޖަމާކޮށްގެން ވެސް ނެރުނެވެ. އެގޮތުން ފްރާންސް ބަހުން ލިޔެފައިވާ ގިނަ ވާހަކަތަކެއް ހިމެނެ އެވެ.
ދެ ކައިވެންޏަކަށް ދެ ކުދިން ލިބުނު ޕޯލް ސްކްރީންޕްލޭ ލިޔުނު ފިލްމުތަކަކީ ދަ އިނަ ލައިފް އޮފް މާޓިން ފްރޮސްޓް (2007)، ލޫލޫ އޮން ދަ ބްރިޖް (1998)، ބްލޫ އިން ދަ ފޭސް (1995) އަދި އެ އަހަރުގެ "ސްމޯކް" އެވެ.
ޕޯލް ވަނީ 1974 އިން ފެށިގެން މެދުކެނޑުމެއް ނެތި މިދިޔަ އަހަރާ ހަމައަށް ލިޔުންތެރިކަމުގެ ތެރޭގައި ވަރަށް ހަރަކާތްރެރިކޮށް އުޅެފަ އެވެ.