އިންޑިއާގެ މަޝްހޫރު ފިލްމީ ތަރި ރަޖްނީކާންތުގެ ވާހަކަ ކިޔައިދޭން ފިލްމެއް ހެދުމުގެ ރައިޓްސް ޕްރޮޑިއުސަރު ސާޖިދު ނަދިއަދުވާލާ އަޑް ދީފައިވާ ކަމަށް ރިޕޯޓްތައް ބުނެފި އެވެ.
ފިލްމީ ޚަބަރުތައް ގެނެސްދޭ މީޑިއާތަކުން ބުނީ މިކަމުގެ އެއްބަސްވުމުގައި މިހާރު ދެ ފަރާތުން ރަސްމީކޮށް ސޮއި ވެސް ކޮށްފައިވާ ކަމަށާއި މިއީ އަގުބޮޑު ބިޔަ ޕްރޮޖެކްޓެއް ކަމަށެވެ.
ބޮލީވުޑްގެ އެންމެ ނުފޫޒު ގަދަ ޕްރޮޑިއުސަރުންގެ ތެރޭގައި ހިމެނޭ ސާޖިދަށް ރަޖްނީކާންތުގެ ބައޮގަރްފިކަލް ޑްރާމާ ހެދުމުގެ ރައިޓްސް ދިން އިރު، މިދިޔަ ފެބްރުއަރީ މަހުގެ ތެރޭގައި ސާޖިދު ކުރި ޕޯސްޓެއްގައި ރަޖްނީކާންތާ އެކީ ޕްރޮޖެކްޓަކަށް ތައްޔާރުވަމުން އަންނަކަން ވެސް އިއުލާންކޮށްފައިވެ އެވެ. އެކަމަކު އެކަމާ ބެހޭ އިތުރު ތަފުސީލެއް ނުދެ އެވެ.
ކުރިން ވަރަށް ގިނަ ހިންދީ ފިލްމުތަކެއް ވެސް ކުޅެފައިވާ ރަޖްނީކާންތު، 73، މިހާރު މުޅިން ވެސް ކުޅެނީ ތަމަޅަ ފިލްމުތަކެވެ.
އޭނަގެ އެންމެ ފަހުގެ ފިލްމަކީ ހާއްސަ ފެނިލުމަކުިން ފެނިގެން ދިޔަ، ފެބްރުއަރީ މަހު ގެނެސްދިން "ލާލް ސަލާމް" އެވެ. މި އަހަރުގެ އޮކްޓޯބަރުގައި ރަޖްނީކާންތުގެ "ވެއްޓައިޔަން" ސިނަމާތަކަށް އަންނާނެ އެވެ. އޭނަގެ ކުރިއަށް ހުރި ފިލްމުތަކުގެ ތެރޭގައި "ކޫލީ" އާއި މިދިޔަ އަހަރުގެ "ޖެއިލާ" ގެ ސީކްއެލް "ހުކުމް" ހިމެނެ އެވެ.