ތުރުކީން އިޒްރޭލާއެކު ވިޔަފާރީގެ މުއަމަލާތްތައް ކުރުން ވަގުތީ ގޮތުން ހުއްޓާލައިފި އެވެ.
ތުރުކީގެ ޓްރޭޑް މިނިސްޓްރީން ބުނީ މި ނިންމުން ނިންމީ އިޒްރޭލުން ފަލަސްތީނުގެ ގާޒާ އަށް ދެމުންދާ ހަމަލާތަކާ ގުޅިގެން ކަމަށެވެ. އިޒްރޭލުން އެއްވެސް ހުރަހެއް ނެތި ގާޒާ އަށް އިންސާނީ އެހީ ފޯރުކޮށް ނުދެނީސް މި ނިންމުން އުވާނުލާނެ ކަމަށްވެސް ތުރުކީން ބުނެ އެވެ.
މި ނިންމުން ނިންމާފައިވާއިރު ތުރުކީ އާއި އިޒްރޭލާ ދެމެދު ކުރާ ވިޔަފާރީގެ މުއާމަލާތްތަކުގެ އަގު މިދިޔަ އަހަރު އެކަނި ވެސް ގާތްގަނޑަކަށް 7 ބިލިއަނަށް އަރަ އެވެ.
ތުރުކީން އިޒްރޭލާއެކު ވިޔަފާރީގެ މުއަމާލާތްތައް ކުރުން ވަގުތީ ގޮތުން ހުއްޓުމަކަށް ގެނައި ނަމަވެސް، އިޒްރޭލާއެކު ގާއިމުކޮށްފައިވާ ޑިޕްލޮމެޓިކް ގުޅުން ތުރުކީން ނިމުމަކަށް މިހާތަނަށް ގެނެސްފައެއް ނވެ އެވެ.
މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ދެމުންދާ ހަމަލާތަކުގައި ގާޒާ އިން ޝަހީދުވި މީހުންގެ އަދަދު ވަނީ 34،000 އަށް ވުރެ މައްޗަށް އަރާފަ އެވެ.
ހަނގުރާމައިގެ ސަބަބުން ގާޒާގެ 85 ޕަސެންޓު މީހުން ގެދޮރު ދޫކޮށް ވަނީ ގޮސްފަ އެވެ. އަދި ގާޒާގެ ބައި މިލިއަނެއްހާ މީހުން ބަޑުހައިހޫނުކަން އަންނަނީ ތަހައްމަލު ކުރަމުންނެވެ.
އިޒްރޭލުން ދަނީ ބައިނަލްއަގުމާވީ ދުނިޔެއިން ފަލަސްތީނަށް އިންސާނީ އެހީ ފޯރުކޮށް ދޭން ކުރަމުން އަންނަ މަސައްކަތްތައް ވެސް ހުއްޓުމެއް ނެތި ހުރަސް އަޅަމުންނެވެ. މީގެ ސަބަބުން ކާނާ އާއި ފެނާއި ބޭސް ފަދަ ތަކެއްޗާ އެކީ ފަލަސްތީނަށް ނުވަދެވި، އެހީގެ އެތައް ގާފިލާއެއް އެބަތިއްބެވެ.