އިޒްރޭލުގެ ޖަލެއްގައި ބަންދުކޮށްފައި ހުންނަތާ ހަތަރު މަހަށް ވުރެ ގިނަ ދުސްވެފައި ވަނިކޮށް ފަލަސްތީނުގެ ޑޮކްޓަރަކު ނިޔާވެއްޖެ އެވެ.
ފަލަސްތީން ޕްރިޒަނާސް އެސޯސިއޭޝަނުން ބުނީ އިޒްރޭލުގެ ޖަލެއްގައި ނިޔާވީ ޑރ. އަދުނާން އަލް ބާޝް، 50، ކަމަށެވެ.
އޭނަ އަކީ ޕަލަސްތީނުގެ އެންމެ ބޮޑު ހޮސްޕިޓަލް ކަމަށްވާ އަލް ޝިފާގެ ސާޖަރީތަކާ ބެހޭ ޑިޕާޓްމަންޓްގެ އެންމެ އިސްވެރިޔާ އެވެ. އިޒްރޭލުން ޑރ. އަދުނާން ހައްޔަރުކުރީ ވަގުތީ ގޮތުން އުތުރު ގާޒާގެ އަލް އަވާދާ ހޮސްޕިޓަލްގައި މަސައްކަތް ކުރައްވަމުން ގެންދަވަނިކޮށް، އިޒްރޭލު ސިފައިން މި އަހަރުގެ ކުރީކޮޅު އެތަނަށް ވަދެގަނެ، ހިންގި ލާއިންސާނީ ޖަރީމާތަކުގެ ތެރޭގަ އެވެ.
އޭނަ ނިޔާވީ އިޒްރޭލުގެ އޮފަރު ޖަލުގަ އެވެ. ނަމަވެސް އަދުނާންގެ މަރާ ގުޅޭ އިތުރު އެއްވެސް ތަފުސީލެއް ލިބިފައެއް ނުވެ އެވެ. މިކަމާ ގުޅިގެން ޕްރިޒަނާސް އެސޯސިއޭޝަނާއި އެޑްވޮކަސީ ގްރޫޕްތަކުން ނެރުނު ބަޔާނެއްގައި ބުނީ އިޒްރޭލުން އަދުނާނު ޝަހީދުކުރީ ކަމަށެވެ. އަދި އޭނަގެ ހަށިގަނޑު ވެސް ފަލަސްތީނާ ހަވާލުނުކުރާތީ ކަންބޮޑުވުން ފާޅުކޮށްފައިވެ އެވެ.
މިދިޔަ އަހަރުގެ އޮކްޓޯބަރު 7 އިން ފެށިގެން އިޒްރޭލުން ފަލަސްތީނަށް ދެމުން ދާ ހަމަލާތަކުގައި އަލް ޝިފާ ހޮސްޕިޓަލްގެ އިތުރުން ފަލަސްތީނުގެ އެތައް ހޮސްޕިޓަލެއް ސުންފާނަތިކޮށް، ގިނަ އަދަދެއްގެ ސިއްހީ އެހީތެރިންގެ ފުރާނަ ވެސް ދުއްވާލާފައިވެ އެވެ.
މިކަމާ ގުޅިގެން ދުނިޔޭގެ ސިއްހަތު ޖަމިއްޔާ ޑަބްލިއުއެޗްއޯ އިން ކަންބޮޑުވުން ވެސް ފާޅުކޮށްފައިވެ އެވެ.