ފެނަކައިން ރަށްރަށުގައި ހިންގާ ފެނާއި ނަރުދަމާގެ 16 މަޝްރޫއެއް އެމްޑަބްލިއުއެސްސީއާ ޙަވާލުކޮށްފި އެވެ.
ކޮންސްޓްރަކްޝަން މިނިސްޓްރީން ބުނީ ރަށްރަށުގައި ހިންގަމުން އަންނަ ފެނާއި ނަރުދަމާގެ މަސައްކަތްތައް އެމްޑަބްލިއުއެސްސީއާ ހަވާލުކުރުމުގެ ގޮތުން ދެ ކުންފުންޏާ އެކީ މަޝްވަރާތަކެއް ވެސް ކޮށްފައިވާ ކަމަށެވެ. އެގޮތުން ޓެކްނިކަލް ބައްދަލުވުމެއް ބާއްވައި ފެނަކައިގެ މަޝްރޫއުތަކެއް ސްޓެލްކޯއާ ހަވާލުކުރީ ޕްރޮޖެކްޓްތައް އަވަހަށް ނިންމުމުގެ ބޭނުމުގައި ކަމަށް މިނިސްޓްރީން ބުންޏެވެ.
ފެނަކައިން 16 ރަށެއްގައި ކުރިއަށް ގެންދާ ފެނާއި ނަރުދަމާގެ މަޝްރޫއުތައް އެމްޑަބްލިއުއެސްސީއާ ހަވާލުކުރި އިރު، އޭގެ ތެރޭގައި ފަށާފައި ހުރި މަޝްރޫއުތަކާއި މެދުކެނޑިފައި ހުރި މަޝްރޫއުތައް ވެސް ހިމެނެ އެވެ.
އެ މަޝްރޫއުތައް ފެނަކައާ ހަވާލުކުރީ ކުރީގެ ސަރުކާރުގަ އެވެ.
ޑރ. މުހައްމަދު މުއިއްޒުގެ ސަރުކާރުން ބުނެފައި ވަނީ މި ސަރުކާރު ވެރިކަމާ ހަވާލުވި އިރު، ސަރުކާރުގެ ކުންފުނިތަކުގެ ތެރެއިން އެންމެ ހާލުގައި އޮތީ ފެނަކަ އެވެ. އެއީ ކުންފުނީގެ ތެރޭގައި ހިންގާފައިވާ ބޮޑެތި ހިޔާނާތްތަކާ ހެދި ކަމަށާއި މިހާރު އެ ކުންފުނީގެ ހާލަތު ރަނގަޅު ކުރަން މަސައްކަތް ކުރަމުން އަންނަ ކަމަށް ސަރުކާރުން ބުންޏެވެ.
ފެނަކަ އިން ވަނީ ކުރީގެ މެނޭޖްމަންޓުން ހިންގާފައިވާ ހިޔާނާތުގެ މައްސަލަތަކެއް އޭސީސީ އަށް ވެސް ހުށަހަޅައިފަ އެވެ.