އަންނަ މަހު ރިލީޒްކުރަން ހަމަޖެހިފައިވާ ފިލްމު "ޗަންދޫ ޗެމްޕިއަން" ގެ ޑަބިންގެ މަސައްކަތް މިހާރު ކުރިއަށްދާ ކަމަށް އެ ފިލްމުގެ ބަތަލު ކާތިކް އާރިއަން ބުނެފި އެވެ.
ފިލްމަށް އަޑު އެޅުމުގެ މަސައްކަތުގައި އުޅެމުން ނަގާފައިވާ ފޮޓޯއަކާ އެކީ އޭނަ އިންސްޓަގްރާމްގައި ބުނީ މިހާރު ކުރިއަށް ދަނީ ޓްރެއިލާގެ ޑަބިން ކަމަށާއި ޓްރެއިލާ ވަރަށް އަވަހަށް އާންމުކުރާނެ ކަމަށެވެ.
މިދިޔަ އަހަރުގެ ފަހުކޮޅު ޝޫޓިން ނިންމައި، ޕޯސްޓް-ޕްރޮޑަކްޝަން މަރުހަލާގައި އޮތް "ޗަންދޫ ޗެމްޕިއަން" ސިނަމާތަކަށް ގެންނަން ހަމަޖެހިފައި ވަނީ އަންނަ މަހުގެ 14 ގަ އެވެ. ކަބީރު ޚާން ޑައިރެކްޓްކޮށްފައިވާ މި ފިލްމަކީ ބައޮގްރަފިކަލް ސްޕޯސްޓް ޑްރާމާއެކެވެ. "ބަޖްރަންގީ ބައިޖާބް" އާއި "އޭކް ތަ ޓައިގާ" އަދި "83" ފަދަ ފިލްމުތައް ގެނެސްދިން ކަބީރާ އެކީ ކާތިކް މަސައްކަތްކުރި ފުރަތަމަ ފިލްމު ބިނާކޮށްފައި ވަނީ ޕެރަލިމްޕިކްގައި ރަން މެޑެލް ހޯދާފައިވާ ކުރީގެ އެތުލީޓް މުރްލީކަންތު ޕެޓްކަރްއަށެވެ.
"ޗަންދޫ ޗެމްޕިއަން" ގައި އޭނަގެ ރޯލު ކުޅެން ކާތިކް ހަށިގަނޑަށް ވެސް ވަރަށް ބޮޑު ބަދަލެއް ގެނަ އެވެ. އެކަމާ ބެހޭ ގޮތުން ހުނަރުވެރި އެކްޓަރު ބުނެފައި މުޅި ފިލްމު ނިމިގެންދާ އިރު، އޭނަގެ ވަރަށް ބޮޑު ޓްރާންސްފޮމޭޝަނެއް ބެލުންތެރިންނަށް ފެނިގެން ދާނެ އެވެ.
މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ "ޗަންދޫ ޗެމްޕިއަން" އަކީ ސާޖިދު ނަދިއަދުވާލާ ޕްރޮޑިއުސްކުރި ފިލްމެކެވެ. މި ފިލްމަށް ފަހު މި އަހަރުގެ ނޮވެމްބަރުގައި ކާތިކް ހޮރޯ-ކޮމެޑީ "ބޫލް ބުލައްޔާ 3" ސިނަމާތަކަށް އަންނާނެ އެވެ.
"ސޯނޫ ކޭ ޓިޓޫ ކީ ސްވީޓީ" އާއި "ޕިޔާރު ކާ ޕަންޗްނާމާ" އާއި "ލުކާ ޗުއްޕީ" އާއި "ސަތިއަޕްރޭމް ކީ ކާތާ" ގެ އިތުރުން "ފްރެޑީ" ފަދަ މަގުބޫލު ފިލްމުތައް ކުޅުނު ކާތިކްގެ އެންމެ ފަހުގެ ފިލްމަކީ މިދިޔަ އަހަރު ފިނި ތަރުހީބެއް ލިބުނު "ޝެހެޒާދާ" އެވެ.