އިނގިރޭސިވިލާތުގެ ލަންޑަންގެ މޭޔަރުގެ މަގާމަށް މިހާރު ވެސް އެ މަގާމުގައި ހުންނެވި ސާދިގް ޚާން އިންތިހާބުވެއްޖެ އެވެ.
މިއީ ޖެހިޖެހިގެން އޭނަ އަށް އެ މަގާމު ލިބވަޑައިގަތް ތިން ވަނަ ފަހަރެވެ. ޕާކިސްތާން ދަރިކޮޅު އިނގިރޭސި ރައްޔިތެއް ކަމަށްވާ ސާދިގު، 53، އެންމެ ފުރަތަމަ ލަންޑަންގެ މޭޔަރަކަށް އިންތިހާބުވީ 2016 ގަ އެވެ.
އިއްޔެ ބޭއްވި އިންތިހާބުގައި ލޭބަ ޕާޓީ ނިސްބަތްވާ ސާދިގު ކާމިޔާބު ކުރެއްވީ ކޮންޒަވޭޓިވް ޕާޓީގެ ކެންޑިޑޭޓް ސޫޒަން ހޯލްއާ ވާދަކުރައްވަ އެވެ. މިއާ އެކީ އޭނަ ވެފައި ވަނީ މިހާތަނަށް އެންމެ ގިނަ ދުވަހު ލަންޑަންގެ މޭޔަރުގެ މަގާމު ފުރުއްވަން ލިބިވަޑައިތް ބޭފުޅާއަށެވެ.
ސާދިގް ކުރިން ގާނޫނު މަޖިލީހުގެ މެންބަރެއްގެ މަގާމު ވެސް ފުރުއްވާފައިވެ އެވެ.
ގިނަ ބަޔަކު ގަބޫލުކުރާ ގޮތުގައި އޭނަގެ މޭޔަރުކަމުގައި މިހާތަނަށް ލަންޑަންގެ ހާލަތު އެތައް ދާއިރާއަކުން ރަނގަޅު ކުރަން އެކަށީގެންވާ ހަރުދަނާ މަސައްކަތްތަކެއް ކުރައްވާފައިވެ އެވެ. އޭގެ ތެރޭގައި ކުށް މަދުކޮށް އަމާންވެއްޓެއް ގާއިމުކުރުމާއި އާންމު ދަތުރުފަތުރުގެ ނިޒާމު ހަރުދަނާ ކުރުމާއި އާންމު ދިރިއުޅުމުގެ ހާލަތު ރަނގަޅު ކުރަން ފިޔަވަޅުތަކެއް އެޅުމާއި ތިމާވެށީގެ މައްސަލަތައް ހައްލުކުރަން ގިނަ މަސައްކަތްތަކެއް ކުރެއްވުން ފަދަ ކަންކަން ހިމެނެ އެވެ.