އަނިލް ކަޕޫރް ވަރަށް ތަފާތު ރޯލެއް ކުޅެފައިވާ ތުރިލާ "ސާވީ: އަ ބްލަޑީ ވައިފް" މި މަހުގެ 31 ގައި ރިލީޒްކުރަން ނިންމައިފި އެވެ.
މާދަމާ ޓީޒާ ވެސް ނެރެން ނިންމާފައިވާ މި ފިލްމަކީ ބުޝަން ކުމާރުގެ ޓީ ސީރީޒާއި ބަޓް ކޭމްޕްގެ ވިޝޭން އެންޓަޓައިންމަންޓުން ގެނެސްދޭ ފިލްމެކެވެ. "ސާވީ" ގެ ބަތަލާ އަކީ ބުޝަންގެ އަންހެނުން ދިވްޔާ ކޯސްލާ ކުމާރެވެ. އަދި މީގެ ކާސްޓްގައި ހާޝްވަރުދަން ރާނޭ ވެސް ހިމެނެ އެވެ.
"ސާވީ" ގެ ޑައިރެކްޓަރަކީ "ދިއްލީ ބެލީ" އާއި "ފޯސް 2" ގެނެސްދިން އަބިނޭ ޑިއޯ އެވެ.
މިހާތަނަށް ކާމިޔާބު އެތައް ފިލްމެއް ކުޅެފައިވާ އަނިލް، 67، ގެ އެންމެ ފަހުގެ ފިލްމަކީ ޖެނުއަރީގައި ރިލީޒްކުރި އޭރިއަލް އެކްޝަން ތުރިލާ "ފައިޓާ" އެވެ.