އަލް ޖަޒީރާ އަކީ ހަމާސް އަށް ވާގިދޭ ނޫސް އެޖެންސީއެއް ކަމަށް ބުނެ އެތަނުގެ ބައިތުލްމަގުދިސް އޮފީސް އިޒްރޭލުން ރެއިޑްކޮށް، އޮޕަރޭޝަން ހުއްޓުވައިފި އެވެ.
މިކަމާ ގުޅޭ ގޮތުން ބޮޑުވަޒީރު ބެންޖަމިން ނަތަންޔާހޫ ބުނީ އިޒްރޭލުގައި އަލް ޖަޒީރާ ހިންގަން ދެން ފުރުސަތު ނުދޭނެ ކަމަށާއި އެގޮތަށް ނިންމީ ކެބިނެޓްގައި މަޝްވަރާތަކެއް ވެސް ކުރުމަށް ފަހު ކަމަށެވެ. އަލް ޖަޒީރާގެ އޮފީސް ހިންގަމުން އައި ބައިތުލްމަގުދިސް "އެމްބެސެޑާ" ހޮޓެލް ރެއިޑްކޮށް، އެތަނުގައި ބޭނުން ކުރަމުން ދިޔަ އެތައް ސާމާނެއް އިޒްރޭލު ފުލުހުންގެ ބެލުމުގެ ދަށަށް ގެންދިޔަ ވާހަކަ އިޒްރޭލުގެ ކޮމިއުނިކޭޝަން މިނިސްޓަރު ޝްލޮމޯ ކަރްހީ އެކްސްގައި ވީޑިއޯއާ އެކީ ހިއްސާ ވެސް ކޮށްފައިވެ އެވެ.
މިކަމާ ގުޅިގެން އަލް ޖަޒީރާ އިން ބުނީ އެ އެޖެންސީ އަށް އިޒްރޭލުން ކުރާ ތުހުމަތުގައި ހަގީގަތެއް ނެތް ކަމަށާއި އޮޕަރޭޝަން ހުއްޓުވި މައްސަލައިގައި ކޯޓަށް ދާނެ ކަމަށެވެ.
އިޒްރޭލުން ފަލަސްތީނާ ދެކޮޅަށް ހިންގަމުންދާ ހަނގުރާމައިގެ ވާހަކަތައް ގެނެސްދޭން ހުރަސް އެޅުމުގެ ގޮތުން އަނިޔާވެރި ޔަހޫދީ ދައުލަތުން މީގެ ކުރިން ވެސް ދިޔައީ މިޑިއާތަކަށް އެތައް ހުރަސްތަކެއް ކުރިމަތި ކުރަމުންނެވެ. އެގޮތުން އިޒްރޭލުން އޮކްޓޯބަރު 7 ގައި ފަލަސްތީނަށް ދޭން ފެށި ހަމަލާތަކުގައި މިހާތަނަށް 200 އެއްހާ ނޫސްވެރިންގެ ފުރާނަ ދުއްވާލާފައިވެ އެވެ.
އޭގެ ތެރޭގައި އަލް ޖަޒީރާއި މަސައްކަތްކުރަމުން އައި ބައެއް މީހުންނާއި އެ މީހުންގެ އާއިލާތައް އެއްކޮށް ނައްތާލާފައިވެ އެވެ.
އިޒްރޭލުން އަލް ޖަރީޒާ ހުއްޓުވި މައްސަލައިގައި އެކިއެކި މިޑިއާތަކާއި އިންސާނީ ހައްގުތަކަށް ވަކާލާތުކުރާ ޖަމިއްޔާ ޖަމާއަތްތަކުން އެކަން ކުށްވެރިކޮށް، އިޒްރޭލުގެ ނިންމުން ބަދަލު ކުރަން ގޮވާލާފައިވެ އެވެ.