ރައްޔިތުންގެ މަޖިލީހުގެ މެންބަރުންގެ އަދަދު މަދުކުރުމަށް ޤާނޫނުއަސާސީއަށް ހުށަހެޅި އިސްލާހު އަނބުރާ ގެންގޮސްފިއެވެ.
ޤާނޫނުއަސާސީއަށް މި އިސްލާހު ހުށަހަޅުއްވާފައިވަނީ މެދުހެންވޭރު ދާއިރާގެ މެންބަރު އަލީ އާޒިމްއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ރިޔާސާތުގައި އިންނެވި މަޖިލީހުގެ ރައީސް މުހައްމަދު އަސްލަމް ވިދާޅުވީ މެންބަރު އަލީ އާޒިމް ޤާނޫނުއަސާސީއަށް ހުށަހަޅުއްވާފައިވާ އިސްލާޙުގެ ބިލު އަނބުރާ ގެންގޮސްފައިވާ ކަމަށާއި، އެހެންކަމުން އެކަން މަޖިލީހުގައި އިއުލާނު ކުރާ ކަމަށެވެ.
ރައްޔިތުންގެ މަޖިލީހުގެ މެންބަރުންގެ އަދަދު ދައުރަކަށްފަހު ދައުރެއް އިތުރުވަމުންދާތީ އެކަމުގެ ކަންބޮޑުވުން ގިނަބަޔަކު އަންނަނީ ފާޅުކުރަމުންނެވެ.
އަލީ އާޒިމް އަނބުރާ ގެންދެވި އިސްލާހުގައި ވަނީ 21 ވަނަ ރައްޔިތުންގެ މަޖިލީހުން ފެށިގެން މެންބަރުންގެ އަދަދު ކަނޑައަޅާނެ އުސޫލު ބަޔާންކޮށްފައެވެ. އެގޮތުން ޤާނޫނުއަސާސީގެ 71 ވަނަ މާއްދާގެ (ނ) އަށް ހުށަހެޅި އިސްލާހުގައި ބުނެފައިވަނީ، އިދާރީ ދާއިރާތަކުގެ ތެރެއިން ޖުމުލަ އާބާދީ 6000 މީހުންނާއި 12000 މީހުންނަށް 1 މެންބަރެއް، 12000 މީހުންނާއި 18000 މީހުންނަށް 2 މެންބަރުން، 18000 މީހުންނާއި 24000 މީހުންނަށް 3 މެންބަރުން، 24000 މީހުންނާއި 36000 މީހުންނަށް 4 މެންބަރުން އަދި 36000 މީހުންނަށް ވުރެ ގިނަ ނަމަ 5 މެންބަރުން އިންތިހާބު ކުރަންވާނެ ކަމަށެވެ.
އާޒިމް އަނބުރާ ގެންދިޔަ އިސްލާހުގައި ޤާނޫނުއަސާސީގެ 72 ވަނަ މާއްދާއަށް އިތުރު ދެ އަކުރެއް އިތުރުކޮށްފައިވެއެވެ. އެގޮތުން އިސްލާހުގައި ބުނެފައިވަނީ، ސިޔާސީ ޕާޓީތަކުން އިންތިހާބީ ދާއިރާއަކަށް ވާދަކުރާ ކޮންމެ 10 ދާއިރާއަކުން 1 ދާއިރާ އަންހެން ކެންޑިޑޭޓަކަށް ހާއްސަ ކުރަންވާނެ ކަމަށެވެ. އަދި މިކަންކަން ފުރިހަމަ ކުރުމަށް ސިސާސީ ޕާޓީތަކާބެހޭ ޤާނޫނުގައި އެކަން ތަފްސީލުކޮށް ބަޔާން ކުރަންވާނެ ކަމަށެވެ.