އިޒްރޭލުގެ ސިފައިން ފަލަސްތީންގެ ރަފާއަށް އެރުން ހުއްޓުވުމަށް ރާއްޖޭގެ ފެންވަރުގައި ކުރެވެން ހުރި ކަމެއް ކުރަން ގޮވާލާ ކުއްލި މައްސަލައެއް ހުށަހަޅައިފިއެވެ.
މި ކުއްލި މައްސަލަ ރައްޔިތުންގެ މަޖިލީހަށް ހުށަހަޅުއްވާފައިވަނީ މެންބަރު އަހުމަދު ސަލީމެވެ. މި ކުއްލި މައްސަލަ ރައްޔިތުންގެ މަޖިލީހުން ބަލައިގަތީ ވޯޓުގައި ބައިވެރިވި 22 މެންބަރުންގެ ވޯޓުންނެވެ.
ސަލީމް ހުށަހެޅި ކުއްލި މައްސަލައިގައި ބުނެފައިވަނީ ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ހިންގަމުންދާ ޖަރީމާތައް އިންތިހާއަށް ބޮޑުވެފައިވާ ދަނޑިވަޅެއްގައި ބައިނަލްއަޤްވާމީ ޤާނޫނުތަކާ އަދި މުޅި ދުނިޔޭގެ އެކިކަންކޮޅުތަކުގެ އެތައް މިލިއަން ބައެއްގެ އާދޭސްތަކަށް ބެލުމެއްނެތި އިޒްލޭލް ސިފައިން ގާޒާ ސިޓީގެ ދެކުނުގައި އޮންނަ ރަފާއަށް، އެއްވެސް ހަމައެއް ލަމައެއް ނެތި އަރަން ތައްޔާރުވަމުންދާ ކަމަށެވެ. އަދި އެކަމަކީ މުޅި ދުނިޔެވެސް އިންތިހާއަށް ކަންބޮޑުވާ އެތައް ކަމެއް އެކުލެވިފައިވާ ކަމެއްކަމަށް ކުއްލި މައްސަލައިގައި ބުނެފައިވެއެވެ.
އިޒްރޭލުގެ މި އުދުވާނުގެ ސަބަބުން ރަފާގައި ގަތުލުއާއްމެއް ހިނގަފާނެ ކަމުގެ ބިރު އުފެދިފައިވާ ކަމަށް ކުއްލި މައްސަލައިގައި ފާހަގަ ކޮށްފައިވެއެވެ. އަދި އިޒްރޭލުގެ މި ޖަރީމާއަކީ ރާއްޖޭގެ ރައްޔިތުންގެ މަޖިލީހުން ކަނޑައެޅިގެން ދެކޮޅު ހަދާ ކަމެއްކަން ހާމަކޮށް އިޒްރޭލް ސިފައިން ރަފާއަށް އެރުން ހުއްޓުވުމަށް ރާއްޖޭގެ ފެންވަރުގައި ކުރެވެން ހުރި ހުރިހާ ކަމެއް ކޮށްދިނުމަށް ދިވެހި ސަރުކާރުން ގޮވާލާ ކަމަށް ކުއްލި މައްސަލައިގައި ބުނެފައިވެއެވެ.
އިޒްރޭލުން މިހާރު ވަނީ ގާޒާގެ ރަފާހް ސިޓީ އަށް ހުއްޓުމެއް ނެތި ބޮން އަޅަން ފަށާފައެވެ. ރަފާއަކީ އިޒްރޭލުން ގާއްޒާއަށް ދޭންފެށި ހަމަލާތަކުން ސަލާމަތްވާން ދިޔަ ރައްޔިތުން ރައްކާތެރިކަން ހޯދާފައިވާ ސަރަހައްދެއްވެ. މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ދެމުންދާ ހަމަލާތަކުގައި ގާޒާ އިން ޝަހީދުވި މީހުންގެ އަދަދު ވަނީ 34،000 އަށް ވުރެ މައްޗަށް އަރާފައެވެ.