ފަލަސްތީނުގެ ގާޒާގައި ހާލުގައި ޖެހިފައި ތިބި ރައްޔިތުންނަށް ބޭނުންވާ އެހީގެ ސާމާނު ވަންދަން އޮންނަ ހަމަ އެކަނި އެއްގަމު މަގު ކަމަށްވާ ރަފާ ބޯޑަރު އިޒްރޭލުން ބަންދުކުރުމުން ގާޒާ އަށް އެހީ ވެއްދުން ހުއްޓުމަކަށް އަތުވެއްޖެ އެވެ.
މިސްރުން ކޮންޓްރޯލް ކުރަމުން އައި ރަފާހް ބޯޑަރު އިޒްރޭލުގެ ބާރުގެ ދަށަށް ގެންގޮސްފައިވާއިރު، އ.ދ އިން ވަނީ އެ އިދާރާގައި އިންސާނީ އެހީ ފޯރުކޮށްދޭން މަސައްކަތް ކުރާ އޮފިޝަލުންނަށް ރަފާހް ބޯޑަރު ހުރަސް ނުކުރެވޭނެކަން އިޒްރޭލުން އަންގާފައިވާ ކަމަށެވެ.
އދ.ގެ ކުޑަކުދިންނާ ބެހޭ ޖަމިއްޔާ ޔުނައިޓެޑް ނޭޝަންސް ޗިލްރަންސް ފަންޑް (ޔުނިސެފް) އިން ބުނީ ގާޒާ އަށް އެހީގެ އެއްވެސް އެއްޗެއް އެތެރެ ނުކުރެވި 24 ގަޑިއިރު ވެގެން ގޮސްފައިވާ ކަމަށާއި މިއީ ވަރަށް ވެސް ހިތާމަ ހުރި ކަމަށެވެ. މީގެ ސަބަބުން ގާޒާގައި ހުރި ކާބޯތަކެތި ހުސްވެ ބަނޑުހައި ހޫނުކަމާ ކުރިމަތިލާން ޖެހިދާނެ ކަމަށް ޔުނިސެފުން ބުނެ އެވެ.
އިޒްރޭލުން މިދިޔަ ހޯމަ ދުވަހުގެރޭ ރަފާހް އަށް ބޮން އަޅަން ފަށާފައިވާއިރު އެގައުމުން މީގެކުރިން ވަނީ މިލިޓަރީ އޮޕަރޭޝަނެއް ފަށަން ބޭނުންވާތީ ރަފާހްގައި ދިރިއުޅެމުންދާ 100،000 ވަޒަން ދޫކޮށް ދިޔުމަށް ވެސް އަންގާފަ އެވެ. ނަމަވެސް މިކަން މިގޮތަށް ނުކުރުމަށް އެތައް ގައުމަކުން އިޒްރޭލު ކިބައިން ވަނީ އެދިފަ އެވެ.
އިޒްރޭލުން ބުނީ ރަފާހް އަށް ދެމުންދާ ހަމަލާތައް އަމާޒުކުރަނީ ހަމާސް ޖަމާއަތުގެ ހަނގުރާމަވެރިން ތިބި ސަރަހައްދުތަކަށް ކަމަށެވެ. އަދި އެ ސަރަހައްދުތަކުން އާންމުން ފޭބުމަށް ވެސް އިޒްރޭލު ސިފައިން އަންނަނީ އަންގަމުންނެވެ. އިޒްރޭލުން ދެމުންދާ ހަމަލާތަކުގެ ރައްދުގައި ގާޒާގެ އެކި ސަރަހައްދުތަކުން އިޒްރޭލަށް އަމާޒުކޮށް ވެސް ވައިގެ ހަމަލާތަކެއް ވަނީ ފޮނުވާލާފަ އެވެ.
މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ދެމުންދާ ހަމަލާތަކުގައި ގާޒާ އިން ޝަހީދުވި މީހުންގެ އަދަދު ވަނީ 34،000 އަށް ވުރެ މައްޗަށް އަރާފަ އެވެ.