ހެރިޓޭޖް އެންޑް މިއުޒިއަމް މެނޭޖްމަންޓްގެ ދާއިރާ އަށް ހާއްސަކޮށްގެން އައްޑޫ ސިޓީ ކައުންސިލަށް ކޮންސަލްޓަންޓަކު ހޯދަން އިއުލާންކޮށްފި އެވެ.
ކައުންސިލުން ނެރުނު އިއުލާނެއްގައި ބުނީ ކޮންސަލްޓަންޓަކު ބޭނުން ވަނީ ދެ އަހަރުގެ މުއްދަތަކަށް ކަމަށެވެ. އެހެންވެ އެ މަގާމަށް ޝައުގުވެރިވާ ފަރާތްތަކަށް އެޕްލައި ކުރުމުގެ ފުރުސަތު މި މަހުގެ 15 އާ ހަމައަށް ވަނީ ހުޅުވާލައިފަ އެވެ. މަގާމަށް ކުރިމަތިލާ މީހުންނާ އިންޓަވިއު ކުރުން ކުރިއަށް ދާނީ މި މަހުގެ 16 އިން އަންނަ މަހުގެ 6 އާ ހަމައަށެވެ.
ކޮންސަލްޓަންޓްގެ އަސާސީ މުސާރަ އަކީ މަހަކު 15،000ރ. އެވެ. އަދި ސާވިސް އެލަވަންސްގެ ގޮތުގައި މަހަކު 5،000ރ. ގެ އިތުރުން ޕެންޝަނާ ބެހޭ ގާނޫނުގެ ދަށުން ލިބިދޭ ޕެންޝަން ކޮންޓްރިބިއުޝަނާއި ނިމަމް ވޭޖްގެ ގޮތުގައި ދިނުމަށް ކަނޑައަޅާފައިވާ އަދަދަށް ވުރެ މަދުން ލިބޭ ނަމަ، އެ އަދަދު ހަމަކުރުމަށް މިނިމަމް ވޭޖް އެލަވަންސް ވެސް ލިބޭނެ އެވެ.
ކޮންސަލްޓަންޓްގެ މައިގަނޑު ޝަރުތަކީ މަގާމުގެ މަސައްކަތާގުޅޭ ދާއިރާއަކުން ފަސް އަހަރު ދުވަހުގެ ތަޖުރިބާ ހާޞިލުކޮށްފައިވުމާއި އައްޑޫގެ ތާރީހާއި ސަގާފަތް އެނގޭ އަދި އެ ދާއިރާގައި ޚިދުމަތްކޮށްފައިވުމެވެ. ކޮންސަލްޓަންޓްގެ މަގާމުގެ މަސްއޫލިއްޔަތުގެ ގޮތުގައި މައިގަނޑު 20 ކަމެއް ހިމެނެ އެވެ.
އޭގެ ތެރޭގައި އައްޑޫގައި ގާއިމު ކުރަން ހަމަޖެހިފައިވާ ހެރިޓޭޖް އެންޑް މިއުޒިއަމް ޔުނިޓްގެ މަސައްކަތް ހިންގައި ބެލެހެއްޓުމާއި މިއުޒިއަމަށާއި އާޓް ގެލެރީއަށް ޒިޔާރަތްކުރާ މީހުންނަށް ތަނުގައި ހުންނަ ތަކެއްޗާގުޅޭ މަޢުލޫމާތު ބޭނުންވެއްޖެ ހިނދެއްގައި ފޯރުކޮށްދިނުމުގެ އިންތިޒާމް ހަމަޖެއްސުމާއި އައްޑޫގެ ސަގާފަތާއި ތާރީހު އަންގައިދޭ ފަދަ ތަކެތި ހޯދައި މިއުޒިއަމް އަދި އާޓް ގެލެރީގައި ބެހެއްޓުމުގެ އިންތިޒާމް ހަމަޖެއްސުމާއި އައްޑޫގެ ސަގާފަތް ދިރުވުމުގެ ގޮތުން، ޤައުމީ އިދާރާތަކުން ބާއްވާ ފޯރަމްތަކާއި އިވެންޓްތަކުގައި ބައިވެރިވުމާއި އެފަދަ އިވެންޓްތަކުގެ މަޢުލޫމާތު ސޯޝަލް އެފެއާޒް ޔުނިޓް އަދި ކައުންސިލާ ހިއްސާކުރުމާއި މިއުޒިއަމާއި އާޓް ގެލެރީއަށް ލިބޭ ފައިސާ، މާލިއްޔަތު ގަވާއިދާ އެއްގޮތަށް ބަލަހައްޓާ، ޚަރަދު ރިޕޯޓްތަކުގައި ތަފުސީލާއި ތަނަށް ލިބޭ ފައިސާގެ ތަފުސީލް ބަޖެޓް ފޮނުވުމުގެ އިންތިޒާމު ހަމަޖެއްސުން ހިމެނެ އެވެ.