މި އަހަރުގެ ބޮޑު އީދު ފާހަގަކުރަން އައްޑޫގައި ބާއްވާ "އައްޑޫ އީދި ސަމާ 1445" ގެ ތެރެއިން ބާއްވާ ފަންނާނުންގެ ޝޯގައި ބައިވެރިވާން ހުޅުވާލައިފި އެވެ.
ކައުންސިލުން ބުނީ ޝޯގައި ޕަފޯމްކުރަން އާޓިސްޓުންނާއި މިއުޒިކް ބޭންޑްތައް ބޭނުންވާ ކަމަށެވެ. އެހެންވެ ޝައުގުވެރިވާ އެފަދަ ފަރާތްތަކަށް އެޕްލައި ކުރުމުގެ ފުރުސަތު މި މަހުގެ 14 އާ ހަމައަށް ވަނީ ހުޅުވާލައިފަ އެވެ. މި ލިންކް މެދުވެރިކޮށް އެޕްލައި ކުރެވޭނެ އެވެ.
ކައުންސިލުން ބުނީ ޝޯގައި ޕަފޯމްކުރަން ހަތަރެކަށް ވުރެ ގިނަ ފަރާތުން ޝައުގުވެރިކަން ފާޅުކޮށްފި ނަމަ ފުރުސަތު ދޭނެ ބަޔަކު ނިންމާނީ ހުށަހެޅި ފަރާތްތަކަށާއި ހުށަހެޅުންތަކަށް ބަލައިފައި ކަމަށެވެ. މިކަމާ ބެހޭ އިތުރު މައުލޫމާތު ކައުންސިލްގެ އެސިސްޓެންޓް ކައުންސިލް އެގްޒެކެޓިވް އައިޝަތު ސުހާ 7617585 އަށް ގުޅައިގެން ހޯދޭނެ އެވެ.
މި އަހަރުގެ ބޮޑު އީދު ކުލަގަދަ ފާހަގަކުރަން "އައްޑޫ އީދި ސަމާ" ގެ ހަރަކާތްތައް ކުރިއަށް ގެންދަން ރާވާފައި ވަނީ އަންނަ މަހުގެ 16-22 އަށެވެ. އެގޮތުން މީގެ ތެރޭގައި ހިމެނޭ ޝޯ އޮންނާނީ 22 ވަނަ ދުވަހުގެ ރޭ އެވެ.
ފާއިތުވި ދެ އަހަރު ވެސް އައްޑޫގައި ބޮޑު އީދު ފާހަގަކުރަން ކުޅިވަރުގެ ގިނަ ހަރަކާތްތަކާ އެކި އައްޑޫގެ ހުރިހާ އަވަށެއްގައި ވެސް ތަފާތު އިވެންޓްތަކެއް ބާއްވާފައިވެ އެވެ.