މި މަހު ރިލީޒްކުރަން ހަމަޖެހިފައިވާ ރާޖްކުމާރު ރާއޯ އާއި ޖާންވީ ކަޕޫރްގެ ރޮމޭންޓިކް ސްޕޯޓްސް ޑްރާމާ "މިސްޓަ އެންޑް މިސިޒް މާހީ" ގެ ޕޯސްޓަރުތަކެއް މިއަދު ދައްކާލައިފި އެވެ.
މި އަހަރުގެ އެންމެ އުންމީދީ ބޮލީވުޑްގެ ފިލްމުތަކުގެ ތެރޭގައި ހިމެނޭ ފިލްމަކީ އެ ދެ ތަރިން ކްރިކެޓް ކުޅުންތެރިންގެ ރޯލުން ފެންނާނެ ފިލްމެކެވެ. ކަރަން ޖޯހަރްގެ ދަރުމާ ޕްރޮޑަކްޝަނަށް ޝަރަން ޝަރުމާ ޑައިރެކްޓްކޮށްފައިވާ "މިސްޓަ އެންޑް މިސިޒް މާހީ" ގެ ޓެގް ލައިނަކީ "އޭން އިމްޕާފެކްޓަލީ ޕާފެކްޓް ޕާޓަނިޝިޕް" އެވެ.
މި ފިލްމަކީ ޖާންވީ އާއި ރާޖް އެކީގައި ކުޅުނު ދެވަނަ ފިލްމެވެ. މި ދެ ތަރިންގެ ފުރަތަމަ ފިލްމަކީ 2021 ގެ ހޮރޯ-ކޮމެޑީ "ރޫހީ" އެވެ. "މިސްޓަ އެންޑް މިސިޒް މާހީ" އަކީ ދަރުމާ އަށް ރާޖް ކުޅުނު ފުރަތަމަ ފިލްމެވެ. މި ފިލްމު މި މަހުގެ 31 ގައި ސިނަމާތަކަށް ގެންނަން ނިންމާފައިވާ އިރު، ރާޖް ކުޅެފައިވާ ބައޮގްރަފިކަލް ޑްރާމާ "ސްރީކާންތު" އަންނަ ހުކުރު ދުވަހު ރިލީޒްކުރާނެ އެވެ.
މި މަހުގެ 31 ގައި ޖާންވީގެ ބޮޑުބޭނެ އަނިލް ކަޕޫރްގެ "ސާވީ: އަ ބްލަޑީ ހައުސްވައިފް" ވެސް ސިނަމާތަކަށް އަންނާނެ އެވެ.
"މިސްޓަ އެންޑް މިސިޒް މާހީ" އަކީ ޖާންވީއާ އެކީ ގެނެސްދިން 2020 ގެ ބައޮގްރަފިކަލް ޑްރާމާ "ގުންޖަން ސަކްސޭނާ: ދަ ކަރްގިލް ގާލް" ގެ ޑައިރެކްޓަރު ޝަރަން ޝަރުމާގެ ދެވަނަ ފިލްމެވެ.