މާލެ ސަރަހައްދުން ސައިކަލު ވަގަށް ނަގާ މައްސަތަކެއްގައި ދެ މީހަކު ހައްޔަރުކޮށްފި އެވެ.
ފުލުހުން ބުނީ ކުރިން ވެސް އެފަދަ ރެކޯޑްތަކެއް އޮތް ދެ މީހަކު ހައްޔަރުކުރީ އިއްޔެ ކަމަށެވެ. އެއީ އުމުރުން 31 އަހަރުގެ ދިވެހި ފިރިހެނަކާއި 38 އަހަރުގެ ދިވެހި ފިރިހެނެކެވެ. ކްރިމިނަލް ކޯޓުން މިހާރު ވަނީ އެ މީހުންގެ ބަންދަށް 15 ދުވަސް ޖަހައިފަ އެވެ.
ބަންދު އަމުރުގައިވާ ގޮތުން ދެ މީހުންގެ މައްޗަށް ވެސް ތުހުމަތު ކުރެވޭ މިންވަރަށް ހެކި ހުށަހަޅާފައިވެ އެވެ. އެގޮތުން 31 އަހަރުގެ މީހާގެ މައްޗަށް ތުހުމަތު ކުރަނީ ސައިކަލު ވަގަށް ނަގައި އެ ދުއްވިކަމުގެ ތުހުމަތެވެ.
އުމުރުން 38 އަހަރުގެ މީހާއާ ސީންގައި ފުލުހުން ސުވާލު ކުރުމުން އޭނާ ބުނެފައި ވަނީ ސައިކަލަކީ އަފީފު ކިޔާ ބޭބެއެއްގެ ސައިކަލެއް ކަމަށެވެ. ނަމަވެސް، ޝަރީއަތުގައި އޭނާ ބުނީ އެ ސައިކަލަކީ ފަޔާޒު ކިޔާ ރައްޓެއްސެއްގެ ސައިކަލެއް ކަމަށެވެ.
ދެ މީހުންގެ ބަންދަށް މުއްދަތު ޖެހި ޝަރީއަތަށް ސައިކަލުގެ ވެރިމީހާ ވެސް ހާޒިރުކުރި އެވެ.