ސައުދީ އަރަބިއްޔާ އިން ރާއްޖެ އަށް މި އަހަރު ދޭ ހައްޖު ކޯޓާ އިތުރުވާނެކަމުގެ އުންމީދު ވަރަށް ބޮޑު ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމު އަލީ ސައީދު ވިދާޅުވެއްޖެ އެވެ.
މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމުގައި ޝަހީމު ވިދާޅުވީ މިދިޔަ އަހަރެކޭ އެއްގޮތަށް މި އަހަރު ވެސް 1،000 ކޯޓާ ކަށަވަރު ނަމަވެސް، އެއަށް ވުރެ ކޯޓާ އިތުރުވުމުގެ ފުރުސަތު ބޮޑު ކަމަށެވެ. ހައްޖު ކޯޓާ އިތުރު ކުރަން މަސައްކަތް ކުރައްވާނެ ކަމަށް މިނިސްޓަރުކަމާ މިދިޔަ އަހަރުގެ ނޮވެމްބަރުގެ 17 ގައި ހަވާލުވެވަޑައިގަތް ފަހުން ޝަހީމު ގެންދަނީ ތަކުރާރުކޮށް ވިދާޅުވަމުންނެވެ.
މިނިސްޓަރު މިއަދު ވިދާޅުވީ ކޯޓާ އިތުރުކޮށް ދޭން އެދި ރައީސް ޑރ. މުހައްމަދު މުއިއްޒު ސައުދީ ސަރުކާރަށް ސިޓީއެއް ވެސް ފޮނުއްވާފައިވާ ކަމަށެވެ.
ޝަހީމް ވިދާޅުވީ ކޯޓާގެ ކަންކަން ސައުދީން މިހާރު ކުރަމުން އަންނަނީ ކުރިން އެކަން ކުރިގޮތުގެ ބަދަލުގައި ވަކި ނިޒާމެއްގެ ތެރެއިން ކަމަށެވެ. އެގޮތުން މިހާރު ތަނުގައި ހުރި މިންވަރަށް ވުރެ އިތުރަށް ޖާގަ ނުދެވޭނެ ގޮތްތަކަށް އިންތިޒާމުތައް ހަމަޖައްސާފައިވާކަމަށް ޝަހީމް ވިދާޅުވި އެވެ.
ގައުމުތަކަށް ދީފައިވާ ކޯޓާތަކުން ބޭނުން ނުކޮށް ހުރި ނަމަ ހައްޖު ގާތްވުމުން އިތުރު ކޯޓާ ލިބިދާނެކަން ސައުދީ ހައްޖު މިނިސްޓްރީން އަންގާފައިވާ ކަމަށް ވެސް ވިދާޅުވިއެވެ.
"އަޅުގަނޑު އުއްމީދުކުރަނީ ކޮންމެވެސް މިންވަރެއްގެ އިތުރުވުމެއް އަންނާނެއޭ. އެކަމަކު އެ އިތުރުންވުން އަންނާނީ ވަރަށް ގާތްކޮށްފައޭ،" މިނިސްޓަރު ވިދާޅުވި އެވެ. "ކޮންމެވެސް ވަރެއް އިތުރުވުން އައުމުގެ އިހްތިމާލު އެބައޮތް. އުއްމީދު ކުރަން އެގޮތަށް." ޝަހީމް ވިދާޅުވިއެވެ.
ސަރުކާރުން ވަނީ މި އަހަރުގެ ހައްޖު ކޯޓާ އެއްކޮށް ހައްޖު ކޯޕަރޭޝަނަށް ދޭން ނިންމައިފަ އެވެ. ނަމަވެސް އިތުރު ކޯޓާ ލިބިއްޖެ ނަމަ ހައްޖު ކޯޕަރޭޝަނުން ހައްޖަށް ގެންދާ އަގަށް ގެންދަން އެއްބަސްވާ އިތުރު ޖަމާއަތްތަކަށް ފުރުސަތު ދިނުމުގެ ވިސްނުން އޮތްކަމަށް ޝަހީމް ވިދާޅުވެފައިވެ އެވެ.