ކުރިއަށް ބޮޑު އީދު ތެރޭގައި އައްޑޫގައި މިއުޒިކް ޝޯއެއް ބާއްވަން ކައުންސިލުން ނިންމާފައި ވަނިކޮށް، އީދުގެ ހުރުމަތް ކަނޑާނުލަން އައްޑޫގެ ޝެއިހަކު ގޮވާލައްވައިފި އެވެ.
ޝެއިހް އަހުމަދު ރިމާޒް ސޯޝަލް މީޑިއާ ޕޯސްޓެއްގައި ވިދާޅުވީ "ޢީދުގެ އުފަލުގެ ޙަރަކާތްތައް ރާވާ އިންތިޒާމުކުރާ ފަރާތްތަކުން އެކަމަށް ސަމާލުކަން ދޭން ވާނެ" ކަމަށެވެ.
ބޮޑު އީދު ކުލަގަދަކޮށް ފާހަގަކުރަން އަންނަ މަހުގެ 16-22 އަށް "އައްޑޫ އީދި ސަމާ 1445" ގެ ނަމުގައި ގިނަ ހަރަކާތްތަކެއް ހިންގަން ނިންމައި އެކަން ކައުންސިލުން އިއުލާންކޮށްފައިވެ އެވެ. އެގޮތުން އަންނަ މަހުގެ 22 ވަނަ ދުވަހުގެ ރޭ މިއުޒިކް ޝޯއެއް ބާއްވަން ވަނީ ނިންމައިފަ އެވެ. އެހެންވެ އޭގައި ޕަފޯމްކުރަން ބޭނުންވާ ފަންނާނުންނާއި ބޭންޑްތަކަށް ބައިވެރިވާން އިއްޔެ ވަނީ ހުޅުވާލައިފަ އެވެ.
"އައްޑޫ އީދި ސަމާ" ގެ އިވެންޓްތަކުގެ ޕާޓްނަރުންނަށްވުމުގެ ފުރުސަތު ވެސް ކައުންސިލުން ވަނީ ހުޅުވާލައިފަ އެވެ.
ފާއިތުވި ދެ އަހަރު ވެސް އައްޑޫގައި ގިނަ ކުޅިވަރު ހަރަކާތްތަކެއް ވެސް ހިމެނޭ ގޮތަށް ކުލަގަދަކޮށް، ބޮޑު އީދު ފާހަގަކޮށްފައިވެ އެވެ. އަދި މިކަމުގެ ތެރޭގައި ދެ ޖިންސްގެ މީހުންނަށް މަސްހުނިވެވޭ ގޮތަށް މިއުޒިކް ޝޯ ބާއްވާތީ ކުރިން ވެސް އައްޑޫގެ ބައެއް ޝެއިހުންނާއި ދީނީ ޖަމިއްޔާތަކުން ކަންބޮޑުވުން ފާޅުކޮށްފައިވެ އެވެ.