ތެލަސީމީ ބަލީގެ މީހުންނަށް ދޭ ބޯންމެރޯ ޓްރާންސްޕްލާންޓް ފަރުވާ އަށް، ބަލި މީހާ އާއި ޑޯނަރު ހަދަން ޖެހޭ ކްރޮސްމެޗު ޓެސްޓު ރާއްޖޭގައި ހެދޭނެ އިންތިޒާމު ހަމަޖައްސައިފި އެވެ.ެ
ތެލެސީމިއާ ދުވަސް ރާއްޖޭގައި ފާހަގަކުރަން ރޭ ބޭއްވި ރަސްމީ ޖަލްސާގައި ހެލްތު މިނިސްޓަރު ޑރ. އަބްދުﷲ ޚަލީލް ވިދާޅުވީ މީގެ ކުރިން ބޯންމެރޯ މެޗު ހެދެނީ ވަރަށް ދަތި ހާލުން ކަމަށާއި އެ ޓެސްޓު ހެދުމަށް ބަލި މީހާ އާއި ޑޯނަރުގެ އިތުރުން އާއިލާގެ މެންބަރުން ވެސް ރާއްޖެ އިން ބޭރަށް ދާން ޖެހޭ ކަމަށެވެ.
"އެހެންވީމަ ފައިސާގެ ގޮތުންނާއި ވަގުތުގެ ގޮތުން ވަރަށް ބޮޑު ގުރުބާނީއެއް ހަގީގަތުގައި ބެލެނިވެރިން ވަމުން ދަނީ، އެހެންނަމަވެސް ﷲގެ ވާގިފުޅާއެކު ރައީސްގެ އިސްނެންގެވުމުގެ މަތިން މިއަދު ރާއްޖޭގައި ތިބެގެން މި ޓެސްޓު ހެދުމުގެ އިންތިޒާމު ވަނީ ހަމަޖެހިފައި." މިނިސްޓަރު ވިދާޅުވިއެވެ.
ޚަލީލް ވިދާޅުވީ އެ ޓެސްޓު ރާއްޖޭގައި ފުރަތަމަ ހެދީ މިދިޔަ މާޗު މަހުގެ 7 ގައި ކަމަށާއި އެ ބުރުގައި 13 މީހަކު ޓެސްޓު ހެދި ކަމަށެވެ. އަދި މި މަސް ތެރޭގައި ނުވަތަ އަންނަ މަހުގެ ތެރޭގައި ޓެސްޓުގެ ދެވަނަ ބުރު ނިންމައިލެވޭނެ ކަމަށް ވިދާޅުވި އެވެ.
"މިއީ ހަގީގަތުގައި ލިބިގެންދިޔަ ވަރަށް ބޮޑު ކާމިޔާބީއެއް މިހާ ހިސާބަށް އައިއިރުގައި މި ފަރުވާ ރަނގަޅުކޮށް އެކަށީގެންވާ ގޮތެއްގައި އެ ބަލި ތަހަމައްމަލު ކުރަމުންދާ ފަރާތްތަކަށް ފޯރުކޮށް ދިނުމަށްޓަކައި." މިނިސްޓަރު ވިދާޅުވި އެވެ.
މޯލްޑިވިއަން ބްލަޑް ސާވިސަސްގެ ތަފާސްހިސާބުތަކުން ދައްކާ ގޮތުގައި ރާއްޖޭގައި މިހާރު ތެލަސީމިއާ ބަލީގެ 659 ޕޭޝަންޓުން އެބަތިއްބެވެ.
ސަރުކާރުން މިހާރު އަންނަނީ ހިލޭ ބޯންމެރޯ ޓްރާންސްޕްލާންޓް ފަރުވާ ވެސް ފަހިކޮށް ދެމުންނެވެ. އެގޮތުން މި ސަރުކާރުން ފަރުވާ އަށް ފޮނުވި ދެ ކުއްޖެއްގެ ކާމިޔާބު ކަމަށް ވެސް ރޭގެ ރަސްމިއްޔާތުގައި ހާމަކޮށްފައިވެ އެވެ.
މި ސަރުކާރުން ވަނީ ކުރިއަށް އޮތް ފަސް އަހަރުގެ ތެރޭގައި ބޯންމެރޯ ޓްރާންސްޕްލާޓްގެ ފުރުސަތު ތެލަސީމިއާ ބަލީގެ 50 މީހަކަށް ދޭން ނިންމައިފަ އެވެ. އެގޮތުން ކޮންމެ އަހަރަކު 10 މީހަކު ފަރުވާ އަށް ފޮނުވަން އޮތީ ނިންމައިފަ އެވެ.