ޝޫޓިން ފެށުމުގެ ތައްޔާރީތައްވަމުން އަންނަ ސަލްމާން ޚާންގެ އާ ފިލްމު "ސިކަންދަރު" ގެ ބަތަލާއަކަށް ރަޝްމިކާ މަންދަނާ ހަމަޖައްސައިފި އެވެ.
އިންޑިއާގެ ދެކުނުގެ ފިލްމުތަކުން ވިދައިލި 28 އަހަރުގެ ބަތަލާ އަކީ މިހާރު ބޮލީވުޑުން ވަރަށް ގިނަ ފުރުސަތުތައް ލިބެމުން އަންނަ ތަރިއެކެވެ. ރަންބީރް ކަޕޫރްގެ މިދިޔަ އަހަރުގެ ބޮޑު ހިޓް "އެނިމަލް" ގެ ބަތަލގެ ރޯލު ވެސް ކުޅުނު ރަޝްމިކާ އަކީ 2021 ގެ މަޝްހޫރު ތެލެގޫ ފިލްމު "ޕުޝްޕާ" ގެ ވެސް ބަތަލާ އެވެ. އެ ފިލްމުގެ ދެވަނަ ބައި މި އަހަރުގެ އޮގަސްޓްގައި ގެނެސްދޭ އިރު، އައްލޫ އަރުޖުންއާ އެކީ ރަޝްމިކާ އަނެއްކާ ވެސް ފެންނާނެ އެވެ.
ސަލްމާންގެ "ސިކަންދަރު" އަށް ރަޝްމިކާ ނެގި އިރު، އޭނަގެ ކުރިއަށް އޮތް ހުރި ބޮލީވުޑްގެ ފިލްމުތަކުގެ ތެރޭގައި ވިކީ ކޯޝަލްގެ ތާރީހީ ފިލްމު "ޗާވާ" ހިމެނެ އެވެ. ސަލްމާނާ އެކީ ފިލްމެއް ކުޅެން ރަޝްމިކާ އަށް ފުރުސަތު ލިިބުނު އިރު، މި ދެ ތަރިންގެ އުމުރުގައި 30 އަހަރުގެ ފަރަގެއް އެބަހުއްޓެވެ. ސަލްމާނަށް މިހާރު 58 އަހަރެވެ.
ނަމަވެސް ބޮލީވުޑްގެ ދުވަސްވީ އެކްޓަރުން ޒުވާން ބަތަލާއިންނާ އެކީ ފިލްމު ކުޅުމަކީ ވަރަށް އާންމު ކަމެކެވެ.
ކުރިން އަޑުއެރި ގޮތުގައި "ސިކަންދަރު" ގެ ބަތަލާއަކަށް ވާނީ ކިއާރާ އަދުވާނީ އެވެ. މި ފިލްމަކީ ސާޖިދު ނަދިއަދުވާލާ ޕްރޮޑިއުސްކޮށް، ތަމަޅަ ޑައިރެކްޓަރު އޭއާރް މުރްގަދޯސް ޑައިރެކްޓްކުރަން ހަމަޖެހިފައިވާ ފިލްމެކެވެ. މުރްގަދޯސް އަކީ އާމިރު ޚާންގެ 2008 ގެ "ގަޖިނީ" ގެ ޑައިރެކްޓަރެވެ.
"ސިކަންދަރު" ސިނަމާތަކަށް ގެންނަން ނިންމާފައި އޮތީ އަންނަ އަހަރުގެ ފިތުރު އީދުގަ އެވެ.