މި މަހުގެ ފަހުކޮޅޫ ދިރާސީ އާ އަހަރު ފަށަން ތައްޔާރުވަމުން އަންނަ އިރު، އަތޮޅުތަކުގެ ސްކޫލްތަކުން މާލޭގެ ސްކޫލްތަކަށް ބަދުލާން 900 އަށް ވުރެ ދަރިވަރުން ހުށަހަޅާފައިވާ ކަމަށް އެޑިއުކޭޝަން ބުނެފި އެވެ.
މިކަމަށް ދިން މުއްދަތު މިދިޔަ އަންގާރަ ދުވަހަށް ހަމަވި އިރު، އަތޮޅުތަކުން ޖުމްލަ 967 ދަރިވަރަކު މާލޭގެ ސްކޫލްތަކަށް ބަދަލުވާން އެދި ހުށަހަޅާފައިވެ އެވެ. އެޑިއުކޭޝަން މިނިސްޓްރީން މިކަމާ ގުޅޭ ގޮތުން އާންމުކުރި ތަފާސްހިސާބު ދައްކާ ގޮތުން 2020 އިން ފެށިގެން އެ ނިސްބަތް އަންނަނީ މަޑުމަޑުން އިތުރުވަމުންނެވެ.
އެގޮތުން 2023-2024 ގެ ދިރާސީ އާ އަހަރު ފެށި އިރު، އަތޮޅުތަކުން މާލޭގެ ސްކޫލްތަކަށް 1،500 ދަރިވަރުން ބަދަލުވެފައިވެ އެވެ. އޭގެ ކުރީގެ ދިރާސީ އަހަރަށް އަތޮޅުތަކުން މާލެ ބަދަލުވީ 780 ދަރިވަރުންނެވެ.
އެންމެ ފަހުން ނިމުނު ދިރާސީ އަހަރަށް ވުރެ ފެށޭ އާ ދިރާސީ އަހަރަށް މާލޭގެ ސްކޫލްތަކަށް ބަދުލާން ހުށަހެޅި އަދަދު ދަށްވި ނަމަވެސް، ޒަމާނުއްސުރެ އަތޮޅުތަކުން މާލެ އަށް ހިޖުރަކުރާ މައިގަނޑު އެއް ސަބަބަކީ ތައުލީމެވެ.
މި މަހުގެ 26 ގައި ދިރާސީ އާ އަހަރު ފަށާ އިރު، އެޑިއުކޭޝަން މިނިސްޓްރީން ބުނީމާލޭގެ ސްކޫލްތަޖުގެ ގްރޭޑް 1 އަށް ވަނުމަށް އެދި 2،163 ފޯމް ހުށައަޅާފައިވާ ކަމަށެވެ. އޭގެ ތެރެއިން 1،192 ފޯމު މާލެ ސަރަހައްދުން ހުށަހެޅި އިރު، 171 ފޯމް ހުށަހެޅީ އަތޮޅު ތެރެއިންނެވެ.
މީގެ އިތުރުން މާލޭގެ ސްކޫލްތަކުގެ ތެރެއިން އެއް ސްކޫލުން އަނެއް ސްކޫލަށް ބަދަލުވުމަށް އެދި 1،158 ފޯމް ހުށައަޅާފައިވާ އިރު، 967 ފޯމް ހުށަހަޅާފައި ވަނީ އަތޮޅުތަކުން މާލޭގެ ސްކޫލްތަކަށް ބަދަލުވުމަށެވެ. އެއާ އެކީ ޖުމްލަ 4،117 ފޯމު ހުށަހަޅާފައިވެ އެވެ.