ފިލްމެއްގައި ސައިފް އަލީ ޚާން ލޯފަން މީހެެއްގެ ރޯލު ކުޅެން ހަމަޖެހިފައިވާ ކަމަށް ރިޕޯޓްތައް ބުނެފި އެވެ.
ފިލްމީ ޚަބަރުތައް ގެނެސްދޭ މީޑިއާތަކުން ބުނީ މިއީ ޑައިރެކްޓަރު ޕްރިޔަދަރުޝަން ހަދަން ނިންމާފައިވާ ތުރިލާއެއް ކަމަށެވެ. އެގޮތުން ފިލްމުގެ ސްކްރިޕްޓް ނިންމައި، ކާސްޓުން ހަމަޖައްސުމުގެ އިތުރަށް، ޝޫޓިން ޝެޑިއުލް ކުރިއަށް ގެންދާނެ ގޮތް މިހާރު ރާވަމުން އަންނަ ކަމަށް ބުންޏެވެ.
ނަން އަދި ހާމަނުކުރާ ފިލްމުގެ ލީޑް ބަތަލަކަށް ސައިފް ފައިނަލްކޮށްފައިވާ އިރު، މި ފިލްމު ވާނީ ޕްރިޔަދަރުޝަނާ އެކީ އޭނަ މަސައްކަތްކުރާ ފުރަތަމަ ފަހަރަށެވެ. ސައިފްގެ އަންހެނުން ކަރީނާ ކަޕޫރް ކުރިން ޕްރިދަރުޝަނާ އެކީ ދެ ފިލްނެއްގެ މަސައްކަތްކޮށްފައިވެ އެވެ. އެއީ "ހަލްޗަލް" އާއި "ކިޔުކީ..؟" އެވެ.
ޕްރިޔަދަރުޝަނަކީ "ހަންގާމާ" އާއި "ބޫލް ބުލައްޔާ" އަދި "ޗުޕް ޗުޕް ކޭ" ފަދަ ފިލްމުތައް ގެނެސްދިން ޑައިރެކްޓަރެވެ. އޭނަގެ އެންމެ ފަހުގެ ފިލްމަކީ މިދިޔަ އަހަރުގެ ތަމަޅަ ފިލްމު "އަޕައްތާ" އެވެ.
ސައިފާ އެކީ ތުރިލާއެއް ހެދުމުގެ ތައްޔާރީތައް ޕްރިޔަދަރުޝަން ވަމުން އަންނަ އިރު، މި އަހަރުގެ ތެރޭގައި އަކްޝޭ ކުމާރާ އެކީ ސިހުރު ހާހޫރައިގެ މައްޗަށް ބިނާކޮށް ހޮރޯ-ފެންޓަސީއެއް ހަދަން ވެސް ވަނީ ނިންމައިފަ އެވެ. ރިޕޯޓްތައް ބުނާ ގޮތުން ދެ ފިލްމިގެ މަސައްކަތް ވެސް އެކުއެކީގައި ކުރިއަށް ގެންދަން އޮތީ ރާވައިފަ އެވެ.
ސައިފް، 53، ގެ ކުރިއަށް ހުރި ފިލްމުތަކުގެ ތެރޭގައި "ދެވާރާ: ޕާޓް 1" އާއި "ޖުވެލް ތީފް" ހިމެނެ އެވެ.