ބޯންމެރޯ ހަދަން ރާއްޖެއިން ބޭރަށް ފޮނުވި ދެ ކުއްޖެއްގެ އޮޕަރޭޝަން ކާމިޔާބު ކަމަށް ހެލްތް މިނިސްޓަރު ޑރ. އަބްދުﷲ ޚަލީލް ވިދާޅުވެއްޖެއެވެ.
ބައިނަލްއަގުވާމީ ތެލެސީމިއާ ދުވަހާ ގުޅިގެން ރޭ ކުރިއަށް ގެންދިޔަ ޖަލްސާގައި ވާހަކަފުޅު ދައްކަވަމުން މިނިސްޓަރު ޚަލީލް ވިދާޅުވީ ސަރުކާރުން ހިލޭ ބޯންމެރޯ ހެދުމަށް ފަސް ކުއްޖަކު ރާއްޖެއިން ބޭރަށް ފޮނުވާފައިވާ ކަމަށެވެ. އޭގެތެރެއިން އޮޕަރޭޝަން ހަދާފައިވަނީ ދެ ކުއްޖެއް ކަމަށާއި، އެ ދެ ކުދިންގެ ހާލުވެސް ރަނގަޅު ކަމަށް ވިދާޅުވިއެވެ.
މިނިސްޓަރު ޚަލީލް ވިދާޅުވީ އޮޕަރޭޝަނަށްފަހު އެ ދެ ކުދިންވެސް ހޮސްޕިޓަލުން ދޫކޮށްލާފައިވާ ކަމަށާއި، އިތުރު އޮބްޒަވޭޝަނަށް އެކޮމޮޑޭޝަންގައި ތިބި ކަމަށެވެ.
މީގެއިތުރުން ބާކީތިބި ތިން ކުދިންގެ އޮޕަރޭޝަންގެ ކަންކަން ވަރަށް އަވަހަށް ހަމަޖެހޭނެ ކަމަށްވެސް ވިދާޅުވިއެވެ.
މި ރަސްމިއްޔާތުގައި ވާހަކަ ދައްކަވަމުން މިނިސްޓަރު ޚަލީލް ވިދާޅުވީ ބޯންމެރޯ ހެދުމަށް މިއަހަރުގެ ތެރޭގައި 10 ކުދިން ރާއްޖެއިން ބޭރަށް ފޮނުވާނެ ކަމަށެވެ. އެގޮތުން ފުރަތަމަ ފޮނުވާ ފަސް ކުރިން މިއަހަރު މެދުތެރޭގައި އަދި ބާކީ ކުދިން އަހަރުގެ ފަހުކޮޅު ފޮނުވާނެ ކަމަށް ވިދާޅުވިއެވެ.
މޯލްޑިވިއަން ބްލަޑް ސާވިސަސްގެ ތަފާސްހިސާބުތަކުން ދައްކާ ގޮތުގައި ރާއްޖޭގައި މިހާރު ތެލަސީމިއާ ބަލީގެ 659 ޕޭޝަންޓުން އެބަތިއްބެވެ.
މި ސަރުކާރުން ވަނީ ކުރިއަށް އޮތް ފަސް އަހަރުގެ ތެރޭގައި ބޯންމެރޯ ޓްރާންސްޕްލާޓްގެ ފުރުސަތު ތެލަސީމިއާ ބަލީގެ 50 މީހަކަށް ދޭން ނިންމާފައެވެ. އެގޮތުން ކޮންމެ އަހަރަކު 10 މީހަކު ފަރުވާ އަށް ފޮނުވަން އޮތީ ނިންމާފައެވެ.