ރައްޔިތުންގެ މަޖިލީހުގެ ފޭދޫ ދާއިރާގެ ކުރީގެ މެންބަރު އަލްހާން ފަހުމީ އިސްކޮށް ހުންނަވައި ހިންގެވި ޕޮންޒީ ސްކީމާ ގުޅިގެން އެ ސްކީމަށް އިންވެސްޓުކުރި މީހަކަށް، ދޭން ބުނި ފައިދާއާ އެކު 100،000ރ. އަށް ވުރެ ގިނަ ރުފިޔާ ދައްކަން އޭނަގެ ހިއްސާ އޮންނަ ކިންގްސް ކެޕިޓަލް ހޯލްޑިންގްސް ކުންފުނީގެ މައްޗަށް ސިވިލް ކޯޓުން އަންގާރަ ދުވަހު ހުކުމްކޮށްފި އެވެ.
އެ ކުންފުންޏާ ދެކޮޅަށް ނިންމި އެ މައްސަލައިގައި ދައުވާކުރީ އިންވެސްޓުކުރި 100،000ރ.ގެ ތެރެއިން ބާކީ ނުލިބިވާ 90،000ރ. އާއި އިންވެސްޓުކުރި ފައިސާއިން ލިބޭ ލިބޭނެ ކަމަށް ދެ ފަރާތުން އެއްބަސްވި 50 ޕަސެންޓް އަދި ގާނޫނީ ވަކީލަށް ހަރަދުކުރަން ޖެހުނު 20،000ރ. އާ އެކީ ޖުމްލަ 160،000ރ. ނަގައި ދިނުމަށެވެ.
އެ މައްސަލާގައި ސިވިލް ކޯޓުން ނިންމީ އެ ދައުވާތަކުގެ ތެރެއިން ގާނޫނީ ވަކީލަށް ހިނގި ހަރަދުގެ ތަފްސީލު ހުށަހަޅާފައި ނުވާތީ އާއި 20،000ރ. އަކީ ދައުވާއާ ގުޅިގެން ދައުވާލިބޭ ފަރާތުން ނަގައިދިނުމަށް އެކަށީގެންވާ ވަރަށް ވުރެ ބޮޑު އަދަދެއް ކަމަށެވެ. އަދި އޭގެ ބަދަލުގައި އެކަށީގެންވާ އަދަދަކީ 5،000ރ. ކަމަށް ޝަރީއަތުން ނިންމި އެވެ.
އެ ބަދަލާ އެކު ސިވިލް ކޯޓުން ކިންގްސް ކުންފުނީގެ މައްޗަށް ހުކުމްކުރީ ޖުމްލަ 145،000ރ. އެކީ އެއްފަހަރާ 7 މެއި އިން ފެށިގެން 7 ދުވަހުގެ ތެރޭގައި ކޯޓަށް ދެއްކުމަށެވެ.
މައްސަލައިގެ ފެށުން – ކުޑަ ދުވަސްކޮޅެއްގެ ތެރޭގައި ބޮޑު ފައިދާއެއް ދޭނެ ކަމަށް ބުނެ އާންމުންގެ އަތުން ފައިސާ ހޯދުމަށް ފޭސްބުކް އާއި ޓެލެގްރާމް ފަދަ ސޯޝަލް މީޑިއާގެ ވަސީލަތްތައް މެދުވެރިކޮށް ހިންގާ ސްކީމެއްގެ މައުލޫމާތު މަރުކަޒީ ބޭންކް، (އެމްއެމްއޭ) އަށް ލިބި، އެ ސްކީމާ މެދު ސަމާލުވާން އެދި މަރުކަޒީން ބޭންކުން މިދިޔަ އަހަރުގެ މާޗުގައި ބަޔާނެއް ވެސް ނެރުނެވެ.
އެމްއެމްއޭގެ ބަޔާނާ ގުޅިގެން ކިންގްސް ކެޕިޓަލް ހޯލްޑިންސްގެ އެކައުންޓް ބޭންކް އޮފް މޯލްޑިވްސް (ބީއެމްއެލް) އިން ފްރީޒް ވެސް ކުރި އެވެ.
ސްކީމާ ގުޅޭ މައްސަލަތަކެއް އެމްއެމްއޭގެ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) އިން ފުލުހުންނަށް ހުށަހެޅުމުން އެ މައްސަލައިގެ ޖިނާއީ ތަހުގީގެއް ފެށީ މިދިޔަ އަހަރުގެ 15 ގަ އެވެ. ނަމަވެސް މައްސަލައިގެ ތަހުގީގު ނުނިމެނީސް ކިންގްސް ކުންފުނީގެ އެކައުންޓް އަންފްރީޒް ކުރުމާ ގުޅިގެނ އަލުން އެ ސްކީމް ކުރިއަށްގެން ދިޔަ ނަމަވެސް ކުރިން އިންވެސްޓު ކުރި ގިނަ އިންވެސްޓަރުންނަށް ފައިސާ ރައްދުކޮށްފައެއް ނުވެ އެވެ.
މިކަމާ ގުޅިގެން އަލްހާން ވިދާޅުވެފައި ވަނީ ރާއްޖޭގެ ގާނޫނާ ހިލާފު އެއްވެސް ކަމެއް ކޮށްފައި ނުވާނެ ކަމަށެވެ.
ނަމަވެސް އޭނަ ހިންގެވި ޕޮންޒީ އަލްހާންގެ ސްކީމުގައި ޖެހުނު މީހަކަށް 90،000ރ. އަދި އިތުރު ތިން މީހަކަށް 700،000 އަށް ވުރެ ގިނަ ރުފިޔާ ދެއްކުމަށް ސިވިލް ކޯޓުން މިދިޔަ އަހަރުގެ މެއި މަހާއި ޑިސެމްބަރުގައި ހުކުމްކުރި އެވެ. ކޮށްފައިވެ އެވެ. އަދި އިތުރު ދެ މީހަކަށް މިލިއަނަކަށް ވުރެ ގިނަ ރުފިޔާ ދެއްކުމަށް މިދިޔަ ފެބްރުއަރީގައި ވެސް ހުކުމްކޮށްފައިވެ އެވެ.