އުފަންވާ ރޭޓް އިންތިހާ އަށް ދަށްވެ، އުމުރުން ދުވަސްވީ މީހުންގެ ބޮޑު އާބާދީއެއް އޮތް ޖަޕާނުގައި ފަޅުގެތަކުގެ އަދަދު މިހާރު 9 މިލިއަނަށް އަރައިފި އެވެ.
ކަމާބެހޭ އިދާރާތަކުން ބުނީ މިކަމުން ދައްކުވައި ދެނީ ޖަޕާންގެ އާބާދީ އިތުރުނުވާ މައްސަލަ ކަމަށެވެ. އެގޮތުން މިހާރު ބޮޑެތި ސިޓީތައް ކަމަށްވާ ޓޯކިއޯ އާއި ކިއޯޓޯ ފަދަ ތަންތަނުގައި ފަޅުގެތައް ދަނީ އިތުރުވަމުންނެވެ. އުމުރުން ދުވަސްވީ މީހުން އަމިއްލަ ގެތައް ދޫކޮށްލައި އޭގެ ތެރެއިން ގިނަ މީހުން ތިބެނީ ދުވަސްވީ މީހުން ބަލަހައްޓާ އެކިއެކި ސެންޓަރުތަކުގަ އެވެ.
ވިހާ ރޭޓް އިންތިހާ އަށް ދަށްވުމާއި އުމުރުން ދުވަސްވީ މީހުންގެ އާބާދީ އަހަރުން އަހަރަށް އިތުރުވަމުންދާތީ، މީގެ ސަބަބުން ޖަޕާނަށް އިގުތިސާދީ ގިނަ ދަތިތަކާ ވެސް ކުރިމަތިލާން ޖެހިފައިވެ އެވެ. ހާއްސަކޮށް ވަޒީފާ އަދާކުރާނެ ޒުވާން ނެތުމުގެ ދަތިކަން ވަރަށް ބޮޑެވެ.
ދުވަސްވީ މީހުންގެ ބޮޑު އާބާދީއާ އެކީ ޖަޕާންގެ ބޮޑެތި ސިޓީތަކުގެ ގެތައް ފަޅުވެ، އެތަންތަން ބަލަހައްޓާނެ ބަޔަކު ނެތުމުގެ ނަތީޖާއަކަށް ވާނީ އަނެއްކާ ވެސް އިތުރު ގެއްލުންތަކަކާ ކުރިމަތިލާން ޖެހޭނެ ކަމަކަށެވެ. ސަބަބަކީ އެތަންތަން މަރާމާތު ކުރާނެ ބަޔަކު ނެތުމާއި ވީރާނާވާން ދޫކޮށްލެވިފައިވުމެވެ.
ޖަޕާންގެ އިންޓާނަލް އެފެއާޒް މިނިސްޓްރީން ދާދި ފަހުން އާންމުކުރި ތަފާސްހިސާބުތައް ދައްކާ ގޮތުން އެ ގައުމުގެ ފަޅުގެތަކުގެ ނިސްބަތް މިހާރު ވަނީ 14 ޕަސެންޓަށް އަރައިފަ އެވެ. މީގެ ތެރޭގައި ގެތަކުގެ ވެރިން ގައުމުން ބޭރުގައި އުޅޭތީ ފަޅުވެފައިވާ ގެތައް ވެސް ހިމެނެ އެވެ.
ޖަޕާނުގެ މިހާރުގެ އާބާދީ އަކީ 122,728,265 އެވެ. ދުނިޔޭގެ އެންމެ މުސްކުޅި އާބާދީ އޮތީ އެ ގައުމުގަ އެވެ. އެންމެ ފަހުގެ ތަފާސްހިސާބުތަކަށް ދައްކާ ގޮތުން ޖަޕާނުގެ ކޮންމެ 10 މީހަކުން އެކަކީ 80 އަހަރު ނުވަތަ އެއަށް ވުރެ ދުވަސްވީ މީހެކެވެ. މިހާރު އެ ގައުމުގެ ޖުމްލަ އާބާދީ އަށް ބަލާ އިރު، 29.1 ޕަސެންޓަކީ އުމުރުން 65 އަހަރުން މަތީގެ މީހުންނެވެ. އަދި ޖަޕާންގެ އާބާދީގެ ތިންބައިކުޅަ އެއް ބަޔަކީ މިހާރު 70-74 އަހަރާ ދެމެދުގެ މީހުންނެވެ.