މިއަދު ވެސް މުޅި ރާއްޖެ އަށް ވައިޓް އެލާޓް

ބޯކޮށް ވާރޭ ވެހޭނެ ކަމަށް ލަފާކޮށް މިއަދު ވެސް މުޅި ރާއްޖެ އަށް ވައިޓް އެލާޓް ނެރެފި އެވެ.

މޫސުމާ ބެހޭ އިދާރާ އިން އެ އެލާޓް ނެރުނީ ހަވީރު 5:45 އިން ފެށިގެން މިރޭ 11:00 އަށެވެ. އެގޮތުން އެ ވަގުތުގެ ތެރޭގައި ބޯކޮށް ވާރޭ ވެހުމާ އެކީ ގުގުރައި ވިލާގަނޑުގައި ގަޑިއަކު 40 މޭލަށް ވައި ގަދަވާނެ ކަމަށް ލަފާކޮށްފައިވެ އެވެ.

އިއްޔެ ވެސް މުޅި ރާއްޖެ އަށް ވައިޓް އެލާޓް ނެރުނެވެ. އަދި ރޭ އއ. އަތޮޅުން ފެށިގެން ތ. އަތޮޅާ ހަމައަށް ޔެލޯ އެލާޓް ވެސް ނެރުނެވެ.

މި ދުވަސްވަރަކީ މުޅި ރާއްޖެ އަށް މޫސުން ވަރަށް ގޯސް ދުވަސްވަރަކަށްވުމާ އެކީ ވާރޭ ވެހި ލިބިދާނެ ގެއްލުންތަކުން ރައްކާތެރިވުމަށް ފިޔަވަޅުތައް އެޅުމަށް ކަމާބެހޭ އިދާރާތަކުން އަންނަނީ އިލްތިމާސް ވެސް ކުރަމުންނެވެ. މިދިޔަ މަހުގެ ފަހިކޮޅު ވެސް އުތުރާއި ދެކުނުގެ ބައެއް ރަށްތަކަށް ބޯކޮށް ވާރޭ ވެހި ފެންބޮޑުވެ، ގެތަކަށް ފެން ވަދެ، އެކި ވަރުގެ ގެއްލުންވެފައިވެ އެވެ.