މާލެ ސަރަހައްދުގައި ކުއްޔަށް ދޭ ތަންތަނުގެ ކުލި ކޮންޓްރޯލްކުރުން އެއީ ކަމުދާ ގޮތް ނޫން ކަމަށާއި، އެއީ ހައުސިން މާކެޓަށް ދޫކޮށްލަން ޖެހޭ ކަމެއް ކަމަށް ހައުސިން މިނިސްޓަރު ޑރ. އަލީ ހައިދަރު އަހުމަދު ވިދާޅުވެއްޖެއެވެ.
ވީޓީވީގެ ޕްރޮގްރާމެއްގައި މިނިސްޓަރު ރޭ ވިދާޅުވީ، ކުލި ކޮންޓްރޯލްކުރުން މާކެޓަށް ދޫކޮށްލަން ޖެހެނީ އެ ކޮންޓްރޯލްކޮށްފި ނަމަ އޭގެ ސަބަބުން ބައެއް މައްސަލަތައް ދިމާވެދާނެތީ ކަމަށެވެ.
"އެހެން ނޫނިއްޔާ އެވާ ގޮތަކީ ކުލި ކޮންޓްރޯލްކުރަން ފަށައިފިއްޔާ ބޮޑެތި ލޯނުތަކާ އެއްޗެހި ނަގައިގެން އިމާރާތްކޮށްފައި ހުންނަ ބަޔަކަށް ލިބޭ ގެއްލުންތަކެއް ވެސް އުޅޭނެ." ހައިދަރު ވިދާޅުވި އެވެ. "އެއީ ހުޅުވާލެވިފައިވާ މާކެޓެއް އޮންނަ ގައުމެއްގައި ކުރަން ކަމުދާ ކަމެއް ކަމުގައި އިކޮނޮމިސްޓުން ވެސް ގަބޫލެއްނުކުރޭ. އެހެންވީމަ އަޅުގަނޑަކަށް ހިޔެއްނުވޭ ކުލި ކޮންޓްރޯލް ކުރުމަކީ އަޅުގަނޑުމެން ކުރަން ކަމުދާ ކަމެއްހެނެއް."
މާލެ ސަރަހައްދުގައި ކުލީގެ އަގުބޮޑުވުމުގެ އަބަދު ވެސް އާންމުން ކުރަމުން އަންނަ ޝަކުވާއެކެވެ. އެހެންވެ ކުލި ކޮންޓްރޯލް ކުރެވޭނެ ނިޒާމެއްގެ މުހިއްމުކަމުގެ ވާހަކަ ވެސް އެކި ފެންވަރުގައި މިހާތަނަށް ދެކެވިފައިވެ އެވެ. އެގޮތުން ކުރިން 800 އަށް ވުރެ ގިނަ މީހުންގެ ސޮޔާ އެކު މާލޭ ޓެނަންޓްސް ޔޫނިއަނުން ކުލި ކޮންޓްރޯލު ކުރުމަށް ގޮވާލައި، ރައްޔިތުންގެ މަޖިލީހަށް ޕެޓިޝަނެއް ވެސް ހުށަހެޅިއެވެ.
މުޅި ރާއްޖެ އަށް ވެސް ބޯހިޔާވަހިކަމުގެ މައްސަލަ ބޮޑުވެފައިވާ އިރު، ހުރިހާ ހިދުމަތެއް ރަނގަޅު ފެންވަރުގައި ލިބެން އޮތް މާލެ ސަރަހައްދުގައި ދިރިއުޅުމުގެ ހަރަދު ވަރަށް ބޮޑެވެ. ހާއްސަކޮށް ކުއްޔަށް ހޭދަކުރަން ޖެހޭ މިންވަރު އިންތިހާ އަށް ބޮޑެވެ. ގިނަ ބަޔަކި ބުނާ ގޮތުގައި އުޅޭ ތަނުގެ ކުލި ދައްކާފައި ކިރިޔަ ކިިރިތާ އަނގަތާ އަތާދިމާވަނީ އެވެ.