ސަރޮގޭޓްކޮށްގެން ކުއްޖަކު ހޯދި އިންޑިއާގެ މަޝްހޫރު ޕްރޮޑިއުސަރު އެކްތާ ކަޕޫރް އަނެއްކާ ވެސް ހަމަ އެގޮތަށް ދަރިޔަކު ހޯދަން ނިންމާފައިވާ ކަމަށް ރިޕޯޓްތައް ބުނެފި އެވެ.
މީޑިއާތަކުން ބުނީ އެކްތާ މި ފަހަރު އުންމީދު ކުރަނީ އަންހެން ކުއްޖެއް ކަމަށާއި ވަރަށް އަވަހަށް އޭނަ އަށް ދެވަނަ ކުއްޖަކު ލިބޭނެ އެވެ. ސަރޮގޭޓްކޮށްގެން އެކްތާ ހޯދި ފުރަތަމަ ދަރިފުޅަކީ މިހާރު 5 އަހަރުވެފައިވާ ރަވީ ކަޕޫރެވެ. އެ ކުއްޖާ އަށް ނަން ދީފައި ވަނީ އެކްތާގެ ބައްޕަ ކުރީގެ މަޝްހޫރު އެކްޓަރު ޖީތެންދުރާގެ އަސްލު ނަމުންނެވެ.
މިހާތަނަށް ކައިވެންޏެއްކޮށްފައި ނުވާ އެކްތާ، 48، އަކީ ޖީތެންދުރާގެ ދޮށީ ދަރިފުޅެވެ. އޭނަގެ ހަގަށް ހުންނަނީ އެކްޓަރު ތުޝާރު ކަޕޫރް، 47، އެވެ. އޭނަ ވެސް ކައިވެންޏެއް ނުކޮށް ސަރޮގޭޓްކޮށްގެން ދަރިޔަކު ހޯދާފައިވެ އެވެ. އެގޮތުން 2016 ގައި ލިބުނު ފިރިހެން ދަރިފުޅުގެ ނަމަކީ ލަކްޝް އެވެ.
އެކްތާ އަކީ އިންޑިއާގެ އެންމެ ނުފޫޒު އަންހެން ޕްރޮޑިއުސަރެވެ. އޭނަ އަކީ ބާލާޖީގެ ނަމުގައި ބޮޑު ޕްރޮޑަކްޝަން ހައުސްއެއް ހިންގަމުންނެވެ. އޭގެ ދަށުން މިހާތަނަށް އެތައް ޓީވީ ސިލްސިލާއަކާއި ފިލްމާއި ވެބް ސީރީޒްތައް ގެނެސްދީފައިވެ އެވެ.